နေပြည်တော် ၊ အောက်တိုဘာလ ၄ ရက်
နေပြည်တော်ရှိ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနတွင် ကညန ၊ MFTB ၊ MICB ၊ အကောက်ခွန်နှင့် ကုန်သွယ်ရေးညွှန်ကြားမှုဦးစီးဌာနတို့ ပါဝင်သည့် One Stop Services အဖွဲ့သည် စက်တင်ဘာလ (၁၉) ရက်နေ့မှစ၍ သက်တမ်းလွန်မော်တော်ယာဉ်များအတွက် သွင်းကုန်ပါမစ်များကို ထုတ် ပေးလျက်ရှိရာ အောက်တိုဘာလ (၃) ရက်နေ့အထိ ကာလအတွင်း သွင်းကုန်ပါမစ် စုစုပေါင်း (၈၆၈) စောင် ထုတ်ပေးခဲ့ပြီးကြောင်း သတင်းရရှိသည်။ ထုတ်ပေးခဲ့ပြီးသည့် သွင်းကုန်ပါမစ်များတွင် Toyota Saloon တင်သွင်းရန် ပါမစ်ထုတ်ပေးရမှု အများဆုံးဖြစ်ကြောင်း ၊ ပါမစ် (၈၆၈) စောင်အနက် Toyota Saloon အတွက် ပါမစ် (၄၃၃) စောင် ထုတ်ပေးခဲ့ရာ ရာခိုင်နှုန်းအားဖြင့် ၅၀% ဝန်းကျင်ရှိကြောင်း ၊ Wagon အုပ်စုတွင်လည်း Toyota Brand အတွက် ပါမစ်လျှောက်ထားမှုများပြီး ပါမစ် (၁၇၄) စောင် ထုတ်ပေးပြီးခဲ့ရာ လက်ရှိကာလ စုစုပေါင်း ထုတ်ပေးပြီးကားပါမစ် အရေအတွက်၏ ၂၀% ရှိကြောင်း သတင်းရရှိပါသည်။
၎င်းအပြင် ကားပါမစ်လာရောက် လျှောက်ထားမှုပမာဏ တစ်နေ့ထက်တစ်နေ့ မြင့်မားလာခဲ့ကြောင်း ၊ စက်တင်ဘာလ (၃၀) ရက်နေ့က တစ်ရက်အတွင်း ပါမစ် (၁၅၄) စောင်သာ အများဆုံးပမာဏအဖြစ် လျှောက် ထားမှုရှိခဲ့သော်လည်း အောက်တိုဘာလ (၃) ရက်နေ့တွင် တစ်ရက်အတွင်း ပါမစ် (၂၃၄) စောင် လာရောက် လျှောက်ထားခဲ့ကြောင်း One Stop Services အနေဖြင့် ကားပါမစ်များကို နေ့ချင်းအပြီး ထုတ်ပေးခဲ့ကြောင်း သတင်း ရရှိပါသည်။
