အာဆီယံ-တရုတ် လွတ်လပ်သော ကုန်သွယ်မှုသဘောတူစာချုပ် (၃.၀) အဆင့်မြှင့်တင်ခြင်းဆိုင်ရာထောက်ပံ့မှုကွင်းဆက် စဉ်ဆက်မပြတ်စေရေးလုပ်ငန်းအဖွဲ့၏ ပထမအကြိမ်မြောက်အစည်းအဝေးအား၂၀၂၄ ခုနှစ်၊ ဧပြီလ ၂၂ ရက်နေ့မှ ၂၃ ရက်နေ့ထိ Video Conference စနစ်ဖြင့် ကျင်းပပြုလုပ်ခဲ့ပါသည်။ အဆိုပါအစည်းအဝေးသို့ အာဆီယံအဖွဲ့ဝင်နိုင်ငံများနှင့် တရုတ်နိုင်ငံမှ ဘာသာရပ်တာဝန်ခံ ကိုယ်စားလှယ်များနှင့် အာဆီယံအတွင်းရေးမှူးချုပ်ရုံးမှ တာဝန်ရှိသူများ ပါဝင်တက်ရောက်ခဲ့ကြပါသည်။
အဆိုပါအစည်းအဝေးသို့ အာဆီယံနိုင်ငံများနှင့် တရုတ်နိုင်ငံတို့မှ ကိုယ်စားလှယ်များသည် လူကိုယ်တိုင်ပါဝင်တက်ရောက်ခဲ့ပြီး အာဆီယံနိုင်ငံများမှ ကိုယ်စားလှယ် (၂၀) ဦးသည် Video Conferencing စနစ်ဖြင့် ပါဝင်တက်ရောက်ခဲ့ကြပါသည်။ မြန်မာနိုင်ငံမှ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနမှ အရာထမ်းကိုယ်စားလှယ် (၂) ဦးသည် Video Conferencing စနစ်ဖြင့် ပါဝင်တက်ရောက်ဆွေးနွေးညှိနှိုင်းခဲ့ပါသည်။
အစည်းအဝေးတွင် ထောက်ပံ့မှုကွင်းဆက် စဉ်ဆက်မပြတ်စေရေးကျွမ်းကျင်သူများအဖွဲ့ အစည်းအဝေးများတွင် အာဆီယံဘက်မှသဘာပတိ (Chair Person) အဖြစ်ဆောင်ရွက်ရန်အတွက် ဆွေးနွေးညှိနှိုင်းခဲ့ရာ အာဆီယံနိုင်ငံများအနေဖြင့် လက်ရှိကာလအထိ သဘာပတိတာဝန်ထမ်းဆောင်ရန် အဆင်ပြေမှုမရှိသည့်အတွက် အာဆီယံအတွင်းမှူးချုပ်ရုံးက သဘာပတိအဖြစ် တာဝန်ယူဆောင်ရွက်သွားမည်ဖြစ်ကြောင်း၊ အာဆီယံ-တရုတ်လွတ်လပ်သော ကုန်သွယ်မှုသဘောတူစာချုပ် (၃.၀) အဆင့်မြှင့်တင်ရေးတွင် ထောက်ပံ့မှုကွင်းဆက်စဉ်ဆက်မပြတ်စေရေးအခန်းတွင် ပါဝင်ထည့်သွင်းမည့်နယ်ပယ်များနှင့်စပ်လျဉ်း၍ တရုတ်နိုင်ငံဘက်မှ အဆိုပြုခဲ့သည့်စာသား (မူကြမ်း) များအပေါ် အာဆီယံနိုင်ငံများမှ ပြန်လည်မေးမြန်းလာသည့်အချက်များ၊ ပြန်လည်အဆိုပြုသည့် စာသား (မူကြမ်း)များအား အဓိကထား ဆွေးနွေးညှိနှိုင်းခဲ့ပါသည်။