(၂၀၁၁ ခုနှစ် မြန်မာ- တရုတ် ကုန်စည်ပြပွဲ မြင်ကွင်ဓာတ်ပုံများ)
ယခုနှစ်ကုန်စည်ပြပွဲမှာ ကုန်သည်များပြသတဲ့ပြခန်းပေါင်း ၂ဝဝ ကျော် ပြသသွားမှာဖြစ်ပြီး၊ မြန်မာနိုင်ငံ ဘက်မှ ဝန်ကြီးဌာနများ၊ သမဝါယမအသင်းများ၊ ကုန်သည်အသင်းများ၊ စက်မှုဇုန်များမှ ပူးပေါင်းပါဝင်ပြသသွား ကြမှာဖြစ်တယ်လို့ သိရပါတယ်။ မြန်မာနိုင်ငံဘက်ကပြသမယ့် ပြခန်းတွေမှာ ကျောက်မျက်ရတနာများ၊ သစ်အချောထည်များ၊ လယ်ယာထွက်ကုန်များ၊ ရေထွက်ကုန်ပစ္စည်းများ၊ တိုင်းရင်းဆေးများ၊ စက်မှုဇုန်များမှ ထုတ်လုပ်တဲ့ လူသုံးအိမ်သုံးပစ္စည်းများ ပါဝင်ပြသ သွားမှာ ဖြစ်ပါတယ်။
မြန်မာ-တရုတ်နယ်စပ်ကုန်သွယ်ရေးအတွက် မူဆယ် ၁ဝ၅ မိုင်ကုန်သွယ်ရေးဇုန်အနေနဲ့ အရေးပါရုံ သာမက ဒေသတွင်း အရှေ့တောင်အာရှနှင့် တောင်အာရှနိုင်ငံများအကြား မဟာဗျူဟာကျတဲ့ စီးပွားရေးဇုန် ဖြစ်တဲ့အပြင် နှစ်နိုင်ငံချစ်ကြည်ရင်းနှီးမှု နဲ့ ပူးပေါင်းဆောင်ရွက်မှုများကို တိုးမြှင့်စေနိုင်ခဲ့ပါတယ်။
အဲဒါကြောင့် မြန်မာ- တရုတ်နယ်စပ်ကုန်သွယ်ရေးရဲ့ ပို့ကုန်၊ သွင်းကုန်၊ ကုန်သွယ်မှုပမာဏအခြေအနေ ကို ကြည့်မယ်ဆိုလျှင် ၂ဝဝ၈-၂ဝဝ၉ ဘဏ္ဍာနှစ်မှာ ၁ဝ၇၆ ဒသမ ၈၁၁ အမေရိကန်ဒေါ်လာသန်း၊ ၂ဝ၁ဝ-၂ဝ၁၁ ဘဏ္ဍာနှစ်မှာ ၁၈ဝဝ ဒသမ ၂၈၂ အမေရိကန်ဒေါ်လာသန်း၊ ၂ဝ၁၁-၂ဝ၁၂ ဘဏ္ဍာနှစ်မှာ ၂၉၈၅ ဒသမ ၄၂၄ အမေရိကန်ဒေါ်လာသန်းအထိ တစ်နှစ်ထက်တစ်နှစ် ကုန်သွယ်မှုပိုမိုတိုးမြှင့်ကုန်သွယ်နိုင်တာကို တွေ့ရှိရပါတယ်။
ယခုလို နှစ်နိုင်ငံနယ်စပ်ကုန်သွယ်ရေးကုန်စည်ပြပွဲများ ကျင်းပနိုင်ခဲ့ခြင်းကြောင့် နှစ်ဖက်နိုင်ငံရှိ ကုန်သည် များအတွက် ကုန်စည်စီးဆင်းမှု လျှင်မြန်နိုင်ခြင်း၊ ကုန်သွယ်မှုတိုးတက်နိုင်ခြင်း၊ မိမိတို့ရဲ့ဈေးကွက်ကောင်းများ ပိုမိုရရှိလာနိုင်တဲ့အတွက် အလုပ်အကိုင် အခွင့်အလမ်းများ ပိုမိုလာတော့မည်ဖြစ်ပါကြောင်း သတင်းကောင်းပါး အပ်လိုက်ရပါတယ်။
အေးအေး (ကမရ)
နယ်စပ်/ဦးစီး