ကြေးနီဝယ်လိုအား စံချိန်တင်အမြင့်ဆုံးမြင့်တက်မည် ခန့်မှန်းရ

ပြည်လည်ပြည့်ဖြိုးမြဲစွမ်းအင်၊ လျှပ်စစ်ကားများနှင့် ဉာဏ်ရည်တုတို့ကြောင့် ကြေးနီဝယ်လိုအား မြင့်တက်ကာ ဈေးနှုန်းများစံချိန်တင် တက်သွားခဲ့သော်လည်း သတ္တုတူးဖော်ရေးလုပ်ငန်းများတွင် ရင်းနှီးမြှုပ်နှံမှုနည်းပါးလာသဖြင့် လာမည့်နှစ်များတွင် ကြေးနီရောင်းအား ကျဆင်းနိုင်ကြောင်း euro newsbusiness သတင်းဌာနက ဖော်ပြထားပါသည်။

ယခုနှစ်စပိုင်းမှစ၍ ကြေးနီဈေးသည် ၂၉ % တက်ခဲ့ပြီး  ရွှေ၊ ငွေ၊ ကြေးနှင့်အလူမီနီယံကဲ့သို့သော သတ္တုပစ္စည်းများ အဓိကရောင်းဝယ်နိုင်သည့် COMEX ဈေးကွက်တွင် ကြေးနီတစ်ပေါင်လျှင် အမေရိကန် ၅ ဒေါ်လာ ဈေးပေါက်ကာ ၂၀၂၂ ခုနှစ် မတ်လ နောက်ပိုင်းမှစ၍ အမြင့်ဆုံးဈေးအဖြစ်  စံချိန်တင်ခဲ့ကြောင်း ဖော်ပြထားပါသည်။

ကြေးနီထောက်ပံ့ရေးကွင်းဆက်တွင် တရုတ်နိုင်ငံက အဓိကအခန်းကဏ္ဍမှ ပါဝင်

ကြေးနီဈေးနှုန်းများ တစ်ရှိန်ထိုးမြင့်တက်လာခဲ့ခြင်းမှာ တရုတ်နိုင်ငံ၏ စီးပွားရေး ပြန်လည်နလံထူ စေရန်အတွက် ဘဏ္ဍာရေးဝန်ကြီးဌာနက အခြေခံအဆောက်အဦရင်းနှီးမြှုပ်နှံမှုလုပ်ငန်းများ၌ ယွမ် ၁ ထရီလီယံ တန်ဖိုးရှိ နှစ်ရှည်ငွေချေးစာချုပ်များ ထုတ်ချေးမည်ဖြစ်ကြောင်း ထုတ်ပြန်ခဲ့မှုကြောင့် ဖြစ်ပါသည်။

တရုတ်နိုင်ငံသည် အဓိက ကြေးနီရောင်းချသူနှင့် စားသုံးသူဖြစ်ရာ သတ္တုဈေးကွက်ကို ကြိုးကိုင်သူ ဖြစ်ပြီး ပြီးခဲ့သည့်မတ်လတွင် တရုတ်ကြေးနီအရည်ကျိုစက်ရုံများက ကြေးနီသန့်စင်စရိတ် သိသိ သာသာ ကျဆင်းလာမှုအား တုံ့ပြန်သည့်အနေဖြင့် ထုတ်လုပ်မှုကို ၅ % မှ ၁၀ % ထိ လျှော့ချရန် သဘောတူညီခဲ့ခြင်းကြောင့် တစ်နှစ်အတွင်း မူလကြေးနီဈေးနှုန်း တစ်ပေါင်လျှင် အမေရိကန် ၄ ဒေါ်လာထက် မြင့်တက်ခဲ့ကာ နောက်ပိုင်း အမေရိကန်ဒေါ်လာဈေး ဆက်တိုက်ကျဆင်းမှုကြောင့် ကြေးနီဈေးနှုန်းသည် ၁၄ လတာကာလအတွင်း အမြင့်ဆုံးသို့ ရောက်ရှိခဲ့ပါသည်။ ကြေးနီဈေးတက် လာခြင်းမှာ အဓိကအားဖြင့် ဗဟိုဘဏ်များက တစ်နှစ်ပတ်လုံး အတိုးနှုန်းလျှော့ချပေးမည်ဟု ထင်ကြေးပေးမှုများကြောင့် ငွေချေး၍ ရင်းနှီးမြှုပ်နှံခဲ့ခြင်းကြောင့်ဖြစ်ကြောင်း ဖော်ပြထားပါသည်။

ဝယ်လိုအားနှင့် ရောင်းလိုအားမညီမျှမှု 

ကြေးနီဈေးနှုန်းသည် သန့်ရှင်းသောစွမ်းအင် အသွင်ကူးပြောင်းမှုကြောင့် ရေရှည်တွင် ဆက်လက် မြင့်တက်နိုင်ကြောင်း၊ ၂၀၃၅ ခုနှစ်တွင် ကြေးနီဝယ်လိုအား နှစ်ဆတိုးလာကာ မက်ထရစ်တန်ချိန် သန်း ၅၀ အထိ ရောက်ရှိနိုင်ကြောင်းနှင့် အမေရိကန်၊ တရုတ်၊ ဥရောပနှင့် အိန္ဒိယတို့မှ ဝယ်လိုအား ကောင်းမည်ဟု S & P Global အဖွဲ့အစည်းက ခန့်မှန်းထားပါသည်။

Statista ၏ အဆိုအရ ကြေးနီသတ္တုထုတ်လုပ်ရေးသည် ၂၀၁၀ ခုနှစ်တွင် မက်ထရစ်တန်ချိန် ၁၆ သန်းမှ ၂၀၂၂ ခုနှစ်တွင် မက်ထရစ်တန်ချိန် ၂၂ သန်းခန့်ထိရှိခဲ့ကြောင်း၊ ယခုအတိုင်း ဆက်လက် ထုတ်လုပ်နိုင်ပါက ကမ္ဘာတစ်ဝန်းထုတ်လုပ်မှုသည် ၂၀၃၆ ခုနှစ်တွင် မက်ထရစ်တန်ချိန် ၃၀သန်းထိ တိုးတက်ထုတ်လုပ်နိုင်မည်ဟု မျှော်မှန်းရသော်လည်း ဝယ်လိုအားသည် ခန့်မှန်းချက်ထက် သိသိ သာသာ ကျဆင်းနိုင်ကြောင်း ဖော်ပြထားပါသည်။

ကြေးနီဝယ်လိုအား မြှင့်တင်ပေးမည့် AI

စွမ်းအင်အသွင်ကူးပြောင်းမှုအပြင် ဉာဏ်ရည်တုနည်းပညာ တိုးတက်လာခြင်း အထူးသဖြင့် ဒေတာ စင်တာများ တည်ဆောက်မှုတို့ကြောင့် ကြေးနီဝယ်လိုအားကောင်းလျက်ရှိကြောင်း၊ ဉာဏ်ရည်တု နည်းပညာကြောင့် ၂၀၃၀ ခုနှစ်တွင် ကြေးနီဝယ်လိုအား မက်ထရစ်တန်ချိန် ၁ သန်းထိ တိုးမြင့်နိုင် ကြောင်း ရိုက်တာ သတင်းဌာနက ဖော်ပြထားပါသည်။ ထို့ပြင် ရောင်းလိုအား မလုံလောက်မှုနှင့် ဝယ်လိုအား အားကောင်းမှုများကြောင့် ၂၀၂၆ ခုနှစ်တွင် ကြေးနီဈေးနှုန်းသည် တစ်ပေါင်လျှင် အမေရိကန် ၅.၄၄ ဒေါ်လာ အထိမြင့်တက်လာနိုင်ပြီး လက်ရှိပေါက်ဈေးထက် ၁၁% မြင့်တက်သွားနိုင်ကြောင်း အမေရိကန်ဘဏ်က ခန့်မှန်းထားပါသည်။

တစ်ချိန်တည်းမှာပင် ကြေးနီလုပ်ငန်းသည်လည်း လာမည့်နှစ်တွင် နှေးကွေးသွားနိုင်ဖွယ်ရှိကြောင်း၊ Goldman Sachs ၏ အစီရင်ခံစာအရ သတ္တုတူးဖော်ရေးကုမ္ပဏီများ၏ ၂၀၂၂ ခုနှစ်၊ ရင်းနှီးမြှုပ်နှံမှု သည် ၂၀၁၀ ပြည့်နှစ်၊ အသုံးစရိတ်ထက် ၅၀% နီးပါးလျော့နည်းခဲ့ကြောင်း၊ လက်တင်အမေရိက နိုင်ငံများ တွင် မကြာခဏဖြစ်ပွားလေ့ရှိသော ကြေးနီသတ္တုတွင်းများ ပျက်စီးမှုများကြောင့် ၂၀၂၄ ခုနှစ်မှစ၍ ကြေးနီထောက်ပံ့မှုလိုအပ်ချက်သည် ပိုမိုကျယ်ပြန့်လာနိုင်ကြောင်း ဖော်ပြထားပါသည်။

Source: https://www.euronews.com/business/

WTO ဌာနခွဲ

ကုန်သွယ်ရေးဦးစီးဌာန