တနင်္သာရီတိုင်းဒေသကြီး မြိတ်ခရိုင်မှာ ရော်ဘာသန့်စင်စက်ရုံအား ယခုနှစ် အောက်တိုဘာလကုန်မှာ ဖွင့်လှစ်သွားနိုင်တော့မှာဖြစ်ပြီး ယခုလက်ရှိမှာတော့ နိုင်ငံခြားပညာရှင်များ၊ ဒေသခံဝန်ထမ်းများနဲ့ စမ်းသပ် လည်ပတ်နေတယ်လို့ သတင်းရရှိပါတယ်။
မူဆယ်(၁၀၅) မိုင် ကုန်သွယ်ရေးဇုန် စခန်းထုတ်နုတ်အင်အား Mobile Team အဖွဲ့သည် ဧပြီလ ၁၉ ရက်နေ့တွင် မူဆယ်အေးရှားဝေါလ်တိုးဂိတ် ပြည်ထောင်စုလမ်းမကြီးပေါ်၌ တရားမဝင်တင်ဆောင်လာတဲ့ မှန်လုံယာဉ်အမှတ် 8H/ xxxx ပေါ်မှ အခန်းအလှဆင်ဆည်းလည်း (ကြီး) (သေး)၊ အပ်ချည်လုံး၊ အလှတင် အရုပ် / ကလေးဆော့ဘောလုံး၊ LED ဆိုင်းဘုတ်များအား စစ်ဆေးတွေ့ရှိသိမ်းဆည်းခဲ့ပါတယ်။ သိမ်းဆည်းရမိ အကောက်ခွန်မဲ့ပစ္စည်းများရဲ့ခန့်မှန်းတန်ဖိုးမှာ ကျပ်ရှစ်သိန်းကျော်ခန့်ဖြစ်ပြီး အကောက်ခွန်အမှုတွဲဖွင့်လှစ် နိုင်ခဲ့ပါတယ်။
မြန်မာ-ဘင်္ဂလားဒေ့ရှ်နယ်စပ်ရှိ စစ်တွေကုန်သွယ်ရေးစခန်းက ဧပြီလ ၁၈ ရက်နေ့မှ ၂၄ ရက်ထိ ကာလအတွင်း လယ်ယာထွက်ကုန်၊ သစ်တောထွက်ကုန်နဲ့ စက်မှုကုန်ချော ၃၆၆ တန်ကျော်တန်ဖိုး ကန်ဒေါ်လာ သုည ဒသမ ဝ၆၅ သန်းဖိုး တင်ပို့နိုင်ခဲ့ပါတယ်။ ယခင်သီတင်းပတ်က သြင်္ကန်ကာလ ပိတ်ရက် ဖြစ်တဲ့အတွက် လုပ်ငန်းဆောင်ရွက်မှု မရှိခဲ့ဘူးလို့ သိရပါတယ်။
မြန်မာ-ထိုင်း နယ်စပ်ရှိ မြဝတီကုန်သွယ်ရေးဇုန်၊ ကော့သောင်းကုန်သွယ်ရေးစခန်းနဲ့ မြိတ်ကုန်သွယ်ရေးစခန်းများက ၂၀၁၅ ဧပြီ ၁၈ ရက်မှ ၂၄ ရက်ကာလအတွင်း ကန်ဒေါ်လာ ၂ ဒသမ ၄၈၆ သန်းတန်ဖိုးရှိ ရေထွက် ၂၄၂၁ တန်ကျော်တင်ပို့နိုင်ခဲ့ပါတယ်။ ယခုတစ်ပတ်အတွင်း မြဝတီကုန်သွယ်ရေးဇုန်က ကန်ဒေါ်လာ ဝ ဒသမ ၁၆၀ သန်း တန်ဖိုးရှိ ငါးမျိုးစုံ ၅၉ တန်နီးပါး၊ ကဏန်း ၂၈ တန်ကျော် ပုဇွန် ၁ တန်တင်ပို့နိုင်ခဲ့ပါတယ်။ ယခင်သီတင်းပတ်နဲ့ နှိုင်းယှဉ်ပါက ၆၇ တန် ကျော်ပိုမိုတင်ပို့နိုင်ပါတယ်။
မြန်မာ-ထိုင်းနယ်စပ်ရှိ မြဝတီကုန်သွယ်ရေးဇုန်နဲ့ ကော့သောင်းနယ်စပ်ကုန်သွယ်ရေးစခန်းက ၂၀၁၅ ခုနှစ် ၊ ဧပြီလ ၁ ရက်မှ ၂၄ ရက်အတွင်း ကန်ဒေါ်လာ သုည ဒသမ ၁၄၃ သန်းတန်ဖိုးရှိ သီဟိုဠ်စေ့ ၁၉ တန် နီးပါးတင်ပို့နိုင်ခဲ့ပါတယ်။မြဝတီကုန်သွယ်ရေးဇုန်က သီဟိုဠ်စေ့တန်ချိန် ၃ တန်ကျော် တန်ဖိုး ကန်ဒေါ်လာ သုည ဒသမ ဝ၂၅ သန်းတင်ပို့နိုင်ခဲ့ပြီး ကော့သောင်းနယ်စပ်စခန်းကတော့ တန်ချိန် ၁၅ တန်ကျော် တန်ဖိုး ကန်ဒေါ်လာ သုည ဒသမ ဝ၁၈သန်းဖိုးတင်ပို့နိုင်ခဲ့ပါတယ်။
တရားမဝင်သစ်များ မိုင်းဖြတ်မှ ဖြတ်သန်းသယ်ဆောင်မဲ့ သတင်းရရှိတဲ့အတွက် တာချီလိတ် နယ်စပ်ကုန်သွယ်ရေးစခန်း၊ ကျိုင်းတုံနယ်စပ်ကုန်သွယ်ရေးစခန်းတို့ ပူးပေါင်း၍ တောထဲတွင် ခိုအောင်းနေသော တရားမဝင်သစ်တင်ယာဉ်များအား တားဆီးရန် ဆောင်ရွက်ခဲ့ကြတယ်လို့သိရပါတယ်။