Department of Trade

          Kanchanaburi  ခရိုင်ရဲ့ အနောက်ပိုင်းမှာ ထိုင်း-မြန်မာ-တရုတ် ကုန်စည်ပြပွဲကို မတ်လ ၂၆ ရက်မှ ၃၁ ရက်ထိ ၆ ရက်ကြာ ကျင်းပခဲ့ပါတယ်။ကုန်စည်ပြပွဲကို သုံးနိုင်ငံအကြား ကုန်သွယ်မှုနဲ့ ခရီးသွားကဏ္ဍများ ဖွံ့ဖြိုးတိုးတက်ရေးအတွက် ရည်ရွယ်ကျင်းပ ခဲ့တယ်လို့သိရပါတယ်။

          ပဲခူးတိုင်းဒေသကြီး၊ ကျောက်တံခါးမြို့နယ် စည်ပင်သာယာခန်းမ၌ ၂၀၁၅ ခုနှစ် မတ်လ ၃၁ ရက်နေ့တွင် စားသုံးသူအကာအကွယ်ပေးရေးအကြောင်း သိကောင်းစရာများ ဟောပြောဆွေးနွေးပွဲ ကျင်းပခဲ့ပါသည်။

          မြန်မာ-ထိုင်းနယ်စပ်ရှိ မြဝတီကုန်သွယ်ရေးဇုန်မှ အဓိကပို့ကုန်ဖြစ်တဲ့ လယ်ယာထွက်ကုန်ကို ၂၀၁၅ ခုနှစ် မတ်လအတွင်း ကန်ဒေါ်လာ ၂ သန်းဖိုး တင်ပို့နိုင်ခဲ့ပါတယ်။ တင်ပို့ခဲ့တဲ့ လယ်ယာထွက်ကုန် များမှာ မြေပဲဆံ ၂၀၆ တန်ကျော်၊ ကြက်သွန်နီ ၆၁၁ တန်ကျော်၊ နှမ်း ၅၁ တန်ကျော် ၊ မတ်ပဲ ၂၄ တန်ကျော်၊ ပဲလွန်းဖြူ ၄၃ တန်ကျော်၊ ကြံ ၁ တန်၊ သီဟိုဠ်စေ့ ၃ တန် နဲ့ပဲတီစိမ်း၊ ဆီးသီးခြောက်တို့ကိုလည်း တင်ပို့နိုင်ခဲ့ပါတယ်။

          မြန်မာ-ဘင်္ဂလားဒေ့ရှ်နယ်စပ်ရှိ မောင်တော နယ်စပ်ကုန်သွယ်ရေးစခန်းသည် ဒေသတွင်းကုန်ပစ္စည်း ထွက်ရှိမှု နည်းပါးသော်လည်း ၂၀၁၄-၂၀၁၅ ဘဏ္ဍာနှစ်တွင် ကုန်သွယ်မှုပမာဏလျာထားချက် ပြည့်မီ ဆောင်ရွက်နိုင်ခဲ့ကြောင်း ၊ ရခိုင်ပြည်နယ်အတွင်းရှိ အခြားမြို့နယ်များမှ မှာယူပြီး ကုန်သည်လုပ်ငန်းရှင်များက ကြိုးစားလုပ်ကိုင်ဆောင်ရွက်ကြသဖြင့် ကုန်သွယ်မှုရလဒ်ကောင်းများ ရရှိခဲ့ခြင်းဖြစ်ကြောင်း မတ်လ ၃၀ ရက်နေ့က ပြုလုပ်တဲ့ ကုန်သွယ်မှုမြှင့်တင်ရေးအစည်းအဝေးမှာ တာဝန်ရှိသူများက ပြောကြားခဲ့တာဖြစ်ပါတယ်။

         မန္တလေး-မူဆယ် ကုန်သွယ်မှုလမ်းကြောင်းတွင် တရားမဝင် ကုန်သွယ်မှုတားဆီးရေးနှင့် စားသုံးသူအကာအကွယ်ပေးရန် တာဝန်ထမ်းဆောင်နေသော လရ(၁)အဖွဲ့က မတ်လ ၂၁ ရက် ၁၀း၃၀ ချိန်မှာ  Toyota Crown Majesta 3G/xxxx ရဲ့ခေါင်းပိုင်းအင်ဂျင်ခန်းနဲ့ နောက်ခန်းတို့မှာ ကျောက်စိမ်းလို့ယူဆရတဲ့ ကျောက်တုံးများ ၊ ကျောက်ပြားအပိုင်းအစများ၊ အဝိုင်းပြားများကို စစ်ဆေးတွေ့ရှိတားဆီးနိုင်ခဲ့ပါတယ်။ ပစ္စည်းများကို အသေးစိတ်စစ်ဆေးစဉ် ယာဉ်မောင်းမှာ ထွက်ပြေးလွတ်မြောက်သွားခဲ့ပါတယ်။