“(၄) ကြိမ်မြောက် တီထွင်မှုမူပိုင်ခွင့်စစ်ဆေးရေးအရာရှိများ အတွေ့အကြုံဖလှယ်ခြင်းဆိုင်ရာအဖွဲ့အစည်း နှင့် အာဆီယံတီထွင်မှုမူပိုင်ခွင့်စစ်ဆေးခြင်းဆိုင်ရာ အလုပ်ရုံဆွေးနွေးပွဲ” သို့မူပိုင်ခွင့်ဦးစီးဌာနမှ ညွှန်ကြားရေးမှူးချုပ် ဦးဆောင်သော ကိုယ်စားလှယ်အဖွဲ့ တက်ရောက်

နေပြည်တော်၊ ဩဂုတ်လ ၂၈
   စင်ကာပူနိုင်ငံတွင် ၂၀၂၅ ခုနှစ်၊ ဩဂုတ်လ ၂၅ ရက်နေ့မှ ၂၉ ရက်နေ့အထိ  ကျင်းပပြုလုပ်သည့် “(၄) ကြိမ်မြောက် စင်ကာပူနိုင်ငံရှိ တီထွင်မှုမူပိုင်ခွင့်စစ်ဆေးရေးအရာရှိများ အတွေ့အကြုံ ဖလှယ်ခြင်းဆိုင်ရာအဖွဲ့အစည်းနှင့် အာဆီယံတီထွင်မှုမူပိုင်ခွင့်စစ်ဆေးခြင်းဆိုင်ရာ ပူးပေါင်းဆောင်ရွက်ရေး အလုပ်ရုံဆွေးနွေးပွဲ”သို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာနမှ ညွှန်ကြားရေးမှူးချုပ် ဒေါက်တာမိုးမိုးသွယ် ဦးဆောင်သော ကိုယ်စား လှယ်အဖွဲ့ တက်ရောက်လျက်ရှိပါသည်။
   အဆိုပါ အလုပ်ရုံဆွေးနွေးပွဲကို အာဆီယံနိုင်ငံများအကြား တီထွင်မှုမူပိုင်ခွင့် စစ်ဆေးခြင်းဆိုင်ရာ အတွေ့အကြုံများကို ဆွေးနွေးဖလှယ်ခြင်းများ ပြုလုပ်နိုင်ရန်နှင့်  မြန်မာနိုင်ငံနှင့် စင်ကာပူနိုင်ငံမူပိုင်ခွင့်ရုံးတို့အကြား  တီထွင်မှုမူပိုင်ခွင့်ဆိုင်ရာ နှစ်နိုင်ငံပူးပေါင်းဆောင်ရွက်မှုများ မြှင့်တင်နိုင်မည့် လုပ်ငန်းစဉ်များကို ဆွေးနွေးနိုင်စေရန် ရည်ရွယ်၍ ကျင်းပရခြင်းဖြစ်ပါသည်။
    အလုပ်ရုံဆွေးနွေးပွဲတွင်  အာဆီယံဈေးကွက်စီးပွားရေး ဖွံ့ဖြိုးတိုးတက်စေရေးကို ဦးတည်နိုင်မည့် တီထွင်မှုမူပိုင်ခွင့်ဆိုင်ရာ လုပ်ငန်းစဉ်များနှင့် တီထွင်မှုမူပိုင်ခွင့်၏ အရေးပါမှုများ၊ အာဆီယံဒေသတွင်း တီထွင်မှုမူပိုင်ခွင့်ဆိုင်ရာ ဆက်လက်အကောင်အထည်ဖော်ဆောင်ရွက်မည့် လုပ်ငန်းစဉ်များကို   တက်ရောက်လာကြသည့် တီထွင်မှုမူပိုင်ခွင့်ပညာရှင်များက ဆွေးနွေးဖလှယ်ကြမည်ဖြစ်ပါကြောင်း၊ ဆက်လက်၍ တီထွင်မှုမူပိုင်ခွင့်နှင့် ဆက်နွယ်သည့် လုပ်ငန်း စဉ်များကို နည်းပညာကျွမ်းကျင်ပညာရှင်များက လက်တွေ့သရုပ်ပြ၍ ဆွေးနွေးကြမည်ဖြစ်ပါကြောင်း၊ အဆိုပါ အလုပ်ရုံဆွေးနွေးပွဲနှင့်အတူ IP Week @ SG 2025 ကိုလည်းပူးတွဲကျင်းပသွားမည်ဖြစ်ပါကြောင်း သတင်းရရှိပါသည်။