မူဆယ် (၁၀၅) မိုင် ကုန်သွယ်ရေးဇုန်မှ ကုန်သွယ်မှုအတွက် လုပ်ငန်းများ ဆောင်ရွက်ပေးနိုင်ခဲ့မှု (၁၈-၁၂-၂၀၂၂)
ပို့ကုန်သွင်းကုန် လိုင်စင်လျှောက်ထားခြင်းများကို Tradenet 2.0 System တွင် Online ဖြင့် လျှောက်ထားနိုင်သည့်အပြင် ကုန်သွယ်ရေးစခန်းများတွင်လည်း လာရောက်လျှောက်ထားပါက ခွင့်ပြုပေး လျက်ရှိသည်။ ၁၈-၁၂-၂၀၂၂ ရက်နေ့တွင် လာရောက်လျှောက်ထားမှုများမှ သွင်းကုန် လိုင်စင် (၁၉)စောင် (၀.၂၅၆) ယွမ်သန်းတန်ဖိုးရှိသည့် စက်နှင့် စက်အပိုပစ္စည်းများ၊ ပန်းသစ်တော်သီး၊ လိမ္မော်သီး၊ စာရေးကိရိယာများ၊ ပိုးသတ်ဆေး အစရှိသည်တို့ကို ခွင့်ပြုထုတ်ပေးခဲ့ပြီး ၂၀၂၂ ခုနှစ်၊ ဒီဇင်ဘာလ (၁)ရက်နေ့ မှ (၁၈)ရက်နေ့ထိ ပို့ကုန်လိုင်စင် (၃) စောင်နှင့် သွင်းကုန်လိုင်စင် (၅၁၁)စောင် ခွင့်ပြုထုတ်ပေးခဲ့သည်။ အများဆုံး ပို့ကုန် ပစ္စည်းများမှာ ပဲမျိုးစုံ၊ ပြောင်း၊ နှမ်းမျိုးစုံ၊ လျှော်ဖြူ (ဆေးကုလားမ) တို့ ဖြစ်ပြီး အများဆုံး သွင်းကုန်ပစ္စည်း များမှာ စက်နှင့်စက်အပိုပစ္စည်းများ၊ ဆောက်လုပ်ရေးလုပ်ငန်းသုံးပစ္စည်းများ၊ မော်တော်ဆိုင်ကယ်အပို ပစ္စည်းများ၊ ပလပ်စတစ်ကုန်ကြမ်းပစ္စည်းများ၊ လျှပ်စစ်မီးသီးနှင့် မီးချောင်းများ၊ ချည်ထည်များ၊ ချုပ်ပြီး အဝတ်အထည်များ၊ ပန်းသီး၊ လိမ္မော်သီး၊ ပန်းသစ်တော်သီး ၊ အခြားလူသုံးကုန်ပစ္စည်းတို့ဖြစ်သည်။
မူဆယ် (၁၀၅) မိုင်ကုန်သွယ်ရေးဇုန်မှ တင်ပို့သည့် ပို့ကုန်ပစ္စည်းများမှ တစ်ဘက်နိုင်ငံသို့ တင်ပို့ ရောင်းချရာတွင် အကောက်ခွန်သက်သာခွင့်အတွက် တရုတ်နိုင်ငံနှင့် အာဆီယံနိုင်ငံများအကြား ထုတ်ပေး သော ပင်ရင်းနိုင်ငံသက်သေခံလက်မှတ် Form E ကို တင်ပို့သူမှ တောင်းခံလာပါက စည်းမျဉ်း၊ စည်းကမ်း များနှင့်အညီ စိစစ်ခွင့်ပြုပေးလျက်ရှိပါသည်။ ၁၈-၁၂-၂၀၂၂ ရက်နေ့တွင် Form E ထုတ်ပေးမှုမှာ (၁၉) စောင် ဖြစ်ပြီး အလူမီနီယမ်ချောင်း (၁) စောင်၊ ချဉ်ပေါင်ဖာလာ (၂)စောင်၊ ကွမ်းသီးခွံ (၁)စောင်၊ သစ်ကြံပိုးခေါက် (၁)စောင်၊ ကဏန်း (၅) စောင်၊ လျှော်ဖြူ (၁)စောင်၊ ဖန်ခါးသီးခြောက် (၁)စောင်၊ ဆန်ကွဲ (၄)စောင်၊ ငါးရှဉ့် (၂) စောင်၊ မိကျောင်းကွမ်းဖတ်စေ့ (၂)စောင် တန်ဖိုး (၄.၈၉၇) ယွမ်သန်း တို့အား ခွင့်ပြုထုတ်ပေးခဲ့ပြီး ၂၀၂၂ ခုနှစ် ဒီဇင်ဘာလ (၁) ရက်နေ့မှ (၁၈) ရက်နေ့ အထိ Form E (၄၀၁) စောင် ထုတ်ပေးခဲ့သည်။
၁၈-၁၂-၂၀၂၂ ရက်နေ့တွင် ပို့ကုန်ယာဉ်စီးရေ (၈၃) စီး၊ သွင်းကုန်ယာဉ်စီးရေ (၅၆) စီး စုစုပေါင်း (၁၃၉) စီး ကုန်သွယ်မှုဆောင်ရွက်ခဲ့ပြီး ယခုရက်ပိုင်းတွင် ဆန်၊ ဆန်ကွဲ၊ ပဲမျိုးစုံ၊ နှမ်းမျိုးစုံ၊ ပြောင်း၊ ဖရဲသီး ၊ သခွားသီး ၊ လိမ္မော်သီး အစရှိသည့် သီးနှံများတင်ပို့သည့် ကာလရောက်ရှိ၍ ပို့ကုန်ယာဉ်စီးရေများ ပိုမိုခဲ့ပါ သည်။ ၁-၁၂-၂၀၂၂ မှ ၁၈-၁၂-၂၀၂၂ ရက်နေ့ အထိ ပို့ကုန်ယာဉ်စီးရေ (၂၈၄၄) စီး၊ သွင်းကုန်ယာဉ်စီးရေ (၁၁၇၄) စီး ကုန်သွယ်မှုဆောင်ရွက်နိုင်ခဲ့သည်။
မြန်မာ-တရုတ် နယ်စပ်ဒေသကုန်သွယ်မှုများအတွက် ငွေပေးချေမှုကို ယွမ်ငွေကြေး၊ ဒေါ်လာငွေကြေးများ ဖြင့် ဆောင်ရွက်လျက်ရှိသည်။ ပဲ၊ ပြောင်း၊ နှမ်း ၊ မြေပဲဆံ တို့ကို ဒေါ်လာငွေကြေး အပြင် ယွမ်ငွေကြေးဖြင့် ပါ ဆောင်ရွက်ခွင့်ပြုပြီး ဆန်၊ ဆန်ကွဲ၊ အခြားလယ်ယာထွက်ကုန်ပစ္စည်းများ နှင့် ရေထွက်ပစ္စည်းဖြစ်သည့် ကဏန်း၊ ငါးရှဉ့်တို့ကို ယွမ်ငွေကြေးဖြင့် ခွင့်ပြုဆောင်ရွက်လျက်ရှိသည်။
မူဆယ်ဒေသမှ အများဆုံးတင်ပို့သည့် ပဲတီစိမ်း ဈေးနှုန်းမှာ ရွှေလီဈေးနှုန်း (၁)တန်လျှင် (၅၀၀၀-၅၅၀၀)ယွမ် ၊ ပြောင်းဖူးစေ့ (၁)တန်လျှင် (၂၂၅၀-၂၃၀၀)ယွမ်၊ နှမ်းနက် (၁)တန်လျှင် (၈၅၀၀-၁၀၅၀၀)ယွမ် ၊ နှမ်းဖြူ (၁)တန်လျှင် (၉၀၀၀-၁၀၀၀၀)ယွမ် ၊ မြေပဲဆံ (၁)တန်လျှင် (၉၀၀၀-၉၅၀၀)ယွမ်၊ ဆန် (ဧည့်မထ) ၂၅% (၁) တန်လျှင် (၂၁၆၀) ယွမ်၊ ဆန်ကွဲ (A 1-2) (၁)တန်လျှင် (၂၄၀၀) ယွမ်၊ ရာဘာ RSS-3 (၁)တန်လျှင် (၁၀၀၀၀-၁၀၃၀၀) ယွမ် ဈေးနှုန်းဖြင့် အရောင်းအဝယ်ပြုလုပ်နေကြောင်းသိရှိရသည်။
ပို့ကုန်လုပ်ငန်းဆောင်ရွက်သည့် လုပ်ငန်းရှင်များအနေဖြင့် မိမိတင်ပို့ခဲ့သည့်ပစ္စည်းများ၏ တန်ဖိုး အတိုင်းတစ်ဖက်နိုင်ငံ ဝယ်ယူသည့် ကုန်ဝယ်သူမှ ပေးချေသည့် ကုန်ဖိုးငွေကို မြန်မာနိုင်ငံတော်ဗဟိုဘဏ်၏ ညွှန်ကြားချက်အတိုင်း ဘဏ်စနစ်ဖြင့် ပို့ကုန်ရငွေများ ဝင်ရောက်နိုင်ရေးဆောင်ရွက်ရန် လိုအပ်ပါကြောင်း အသိပေးထားပါသည်။