Department of Trade

   ဒေသတွင်း ဘက်စုံစီးပွားရေးပူးပေါင်းဆောင်ရွက်မှုသဘောတူညီချက်၏ ဒုတိယအကြိမ်မြောက် ပင်ရင်းနိုင်ငံစည်းမျဉ်းဆိုင်ရာ ဆပ်ကော်မတီအစည်းအဝေးကို အင်ဒိုနီးရှားနိုင်ငံ၊ ဆူရာဘယားမြို၌ ၂၀၂၃ ခုနှစ်၊ ဇူလိုင်လ ၁၈ ရက်နေ့တွင်ကျင်းပခဲ့ပါသည်။ အစည်းအဝေးကို မြန်မာနိုင်ငံမှ ဘာသာရပ်တာဝန်ခံကိုယ်စားလှယ်အဖြစ် ကုန်သွယ်ရေးဦးစီးဌာနမှ ကိုယ်စားလှယ် (၁) ဦးနှင့် အကောက်ခွန်ဦးစီးဌာနမှ ကိုယ်စားလှယ် (၂) ဦး တို့ Online ဖြင့် ပါဝင်တက်ရောက်ခဲ့ပါသည်။

     အစည်းအဝေးတွင် ဒုတိယအကြိမ်နှင့် တတိယအကြိမ် ဒေသတွင်းဘက်စုံစီးပွားရေးပူးပေါင်းဆောင်ရွက်မှု ပူးတွဲကော်မတီအစည်းအဝေးရလာဒ်များကို မှတ်တမ်းတင်ခဲ့ကြသည်။ ဒေသတွင်းဘက်စုံစီးပွားရေးပူးပေါင်းဆောင်ရွက်မှု သဘောတူညီချက်အောက်ရှိ သီးသန့် စည်းမျဉ်း HS 2022 နှင့် ပြန်လည်ပြင်ဆင်ထားသော Form RCEP ၏ နောက်ကျော ဘက်တွင်ဖော်ပြထားသည့် ရှင်းလင်းချက်များကို အကောင်အထည်ဖော်မှုလမ်းညွှန်ချက် များနှင့်အညီ ဆောင်ရွက်ထားရှိမှုများကို ဆွေးနွေးခဲ့ကြပါသည်။

   ဆက်လက်၍ ပင်ရင်းမှတ်ကျောက်သတ်မှတ်ချက်၊ ပင်ရင်းကြေညာချက်နမူနာပုံစံနှင့် ပတ်သက်၍ ကိုရီးယားနိုင်ငံကတင်ပြသော အီလက်ထရောနစ်စာတမ်း၊ တရုတ်နိုင်ငံ၏ တောင်းဆိုမှုအရ ဆက်သွယ်ဆောင်ရွက်ရမည့် ကိုယ်စာလှယ်စာရင်း၊ အစည်းအဝေး မှတ်တမ်းအတည်ပြုခြင်းနှင့် လာမည့်အစည်းအဝေးအတွက် အချိန်နှင့် နေ့ရက်တို့ကို အတည်ပြုသတ်မှတ်ခြင်းတို့ကို ဆွေးနွေးခဲ့ကြပါသည်။

    မြန်မာနိုင်ငံနှင့် ကနေဒါနိုင်ငံတို့အကြားနှစ်နိုင်ငံဆွေးနွေးမှု (bilateral discussion) ကို Virtual စနစ်ဖြင့် ၂၀၂၃ ခုနှစ်၊ ဇူလိုင်လ ၄ ရက်တွင် ကျင်းပပြုလုပ်ခဲ့ရာ မြန်မာနိုင်ငံမှ ဘာသာရပ်ဆိုင်ရာကိုယ်စားလှယ်အဖြစ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနမှ အရာထမ်းကိုယ်စားလှယ်(၁) ဦး ပါဝင်တက်ရောက်ခဲ့ပါသည်။ 

    အာဆီယံနှင့် ကနေဒါနိုင်ငံတို့အကြား ညှိနှိုင်းဆွေးနွေးလျက်ရှိသော လွတ်လပ်သောကုန်သွယ်မှုဒေသထူထောင်ရေးညှိနှိုင်းဆွေးနွေးမှုများတွင် ဝန်ဆောင်မှုကုန်သွယ်ရေးဆိုင်ရာ ဈေးကွက်ဝင်ရောက်ခွင့်များ အကျိုးရှိစွာ အကောင်အထည်ဖော် ဖလှယ်နိုင်ရေးအတွက် ပထမဆုံးအကြိမ် မြန်မာ နှင့် ကနေဒါ နှစ်နိုင်ငံအကြား ညှိနှိုင်းဆွေးနွေးမှုများကို စတင်ခဲ့ပါသည်။ ကနေဒါနိုင်ငံဘက်မှ မြန်မာနိုင်ငံ၏ ကွန်ပျူတာဝန်ဆောင်မှု၊ ဆက်သွယ်ရေးဝန်ဆောင်မှုနှင့် ဖြန့်ဖြူးရေးဝန်ဆောင်မှုကဏ္ဍများကို စိတ်ဝင်စားကြောင်း ဆွေးနွေးခဲ့ပါသည်။ မြန်မာနိုင်ငံအနေဖြင့်လည်း ကနေဒါနိုင်ငံ၏ ခရီးသွားဝန်ဆောင်မှုနှင့် ဖြန့်ဖြူးရေးဝန်ဆောင်မှုကဏ္ဍများကို စိတ်ပါဝင်စားကြောင်း ဆွေးနွေးခဲ့ပါသည်။