တရုတ်နှင့် အင်ဒိုနီးရှားအကြား နယ်စပ်ဖြတ်ကျော် QR ငွေပေးချေမှုစနစ် စတင်မိတ်ဆက်

ဇွန်လ ၁၁ ရက်က ရှန်ဟိုင်းမြို့၌ ကျင်းပခဲ့သည့် ပူးတွဲလုပ်ငန်းအစီအစဉ်၏ ဒုတိယအကြိမ်မြောက် ဥက္ကဋ္ဌများ အစည်းအဝေးတွင် တရုတ်ပြည်သူ့ဘဏ် (PBOC) နှင့် အင်ဒိုနီးရှားဗဟိုဘဏ် (Bank Indonesia) တို့၏ ဥက္ကဋ္ဌများရှေ့မှောက်၌ နှစ်နိုင်ငံအကြား နယ်စပ်ဖြတ်ကျော် QR ငွေပေးချေမှု ချိတ်ဆက်မှုစနစ်ကို တရားဝင်ကြေညာခဲ့ခြင်းဖြစ်သည်။ ဤပူးပေါင်းဆောင်ရွက်မှုကြောင့် တရုတ်ပြည်မကြီးပြင်ပရှိ UnionPay QR စနစ်သုံး ကုန်သည်အရေအတွက်မှာလည်း ၄၆ သန်း ကျော်အထိ စံချိန်တင် မြင့်တက်သွားခဲ့သည်။

အဆိုပါအခမ်းအနားသို့ China UnionPay နှင့် UnionPay International (UPI) ၏ ဥက္ကဋ္ဌ Dong Junfeng၊ အင်ဒိုနီးရှားငွေပေးချေမှုစနစ်အသင်း (ASPI) ၏ ဥက္ကဋ္ဌ Santoso Liem၊ Bank of China ၏ ဥက္ကဋ္ဌ Ge Haijiao၊ UPI ၏ စီအီးအို Larry Wang နှင့် Ant International ၏ စီအီးအို Yang Peng တို့ကဲ့သို့သော ဘဏ္ဍာရေးကဏ္ဍမှ ထိပ်သီးခေါင်းဆောင်များ တက်ရောက်ခဲ့ကြသည်။

ဤငွေပေးချေမှုချိတ်ဆက်မှုသည် အစိုးရအချင်းချင်း (G2G) မူဘောင်အောက်တွင် တရုတ်နှင့် အင်ဒိုနီးရှားအကြား ဒစ်ဂျစ်တယ်ဘဏ္ဍာရေး ပူးပေါင်းဆောင်ရွက်မှုအတွက် စံနမူနာတစ်ခုဖြစ်လာခဲ့ပြီး နှစ်နိုင်ငံ ပြည်သူများအတွက် အဆင်ပြေ၊ လုံခြုံပြီးထိရောက်သော နယ်စပ်ဖြတ်ကျော်ငွေပေးချေမှု ဝန်ဆောင်မှုများကို ပေးစွမ်းနိုင်ရုံသာမက နှစ်နိုင်ငံပြည်သူနှင့် စီးပွားရေးလုပ်ငန်းများအကြား ကုန်သွယ်ရေးဆက်ဆံမှုကို မြှင့်တင်ပေးပါသည်။ UnionPay သည် Ant International နှင့် Bank of China (Hong Kong) ဂျကာတာဘဏ်ခွဲတို့နှင့် ပူးပေါင်းဆောင်ရွက်ခဲ့ကာ တရုတ်လုပ်ငန်းများ ကမ္ဘာလုံးဆိုင်ရာ စံပြနမူနာကောင်းတစ်ခုကို ပြသနိုင်ခဲ့ပြီး နှစ်နိုင်ငံပြည်တွင်း သုံးစွဲငွေဖြင့် ပေးချေမှုရှင်းလင်းခြင်းကို လမ်းပြလုပ်ဆောင်ခဲ့သည်။ 

ယင်းကြောင့် တရုတ်ပြည်မကြီးတွင်  Indonesian wallets များဖြင့် ပြုလုပ်သော အရောင်းအဝယ်များကို တရုတ်ယွမ်ငွေ (RMB) ဖြင့် သုံးစွဲနိုင်ပြီး၊ အင်ဒိုနီးရှားတွင် Chinese wallets များဖြင့် ပြုလုပ်သော အရောင်းအဝယ်များကို Indonesian Rupiah ဖြင့် အသုံးပြုနိုင်မည်ဖြစ်ရာ နိုင်ငံတကာစျေးကွက်တွင် တရုတ်ယွမ်ငွေ၏ လက်ခံမှုနှင့် သုံးစွဲသူ အကြိုက်တွေ့မှုကို ထိရောက်စွာ မြှင့်တင်ပေးနိုင်ခဲ့ပါသည်။  ထို့ပြင် နယ်စပ်ဖြတ်ကျော် ငွေပေးချေမှုချိတ်ဆက်မှုအတွက် ထပ်မံအတုယူ၍ တိုးချဲ့နိုင်သော မူဘောင်တစ်ခုကို ဖန်တီးပေးကာ လက်တင်အမေရိကနှင့် ဥရောပကဲ့သို့ ကမ္ဘာတစ်ဝန်းရှိ အခြားဒေသများနှင့် ချိတ်ဆက်ဆောင်ရွက်ရန် လမ်းခင်းပေးလိုက်ခြင်းဖြစ်သည်။

လက်ရှိတွင် အာဆီယံ ၁၁ နိုင်ငံအနက် ၇ နိုင်ငံ၏ ငွေပေးချေမှုကွန်ရက်များသည် UnionPay နှင့် အပြန်အလှန် ချိတ်ဆက်အသုံးပြုနိုင်ပြီဖြစ်သည်။

တရုတ်နိုင်ငံသား အသုံးပြုသူများသည် အင်ဒိုနီးရှားနိုင်ငံတစ်ဝန်းရှိ QRIS (Quick Response Code Indonesian Standard) ကုန်သည်ဆိုင်ခန်းပေါင်း သန်းနှင့်ချီတွင် QR စနစ်ဖြင့် ငွေပေးချေမှုများပြုလုပ်ရန်အတွက် UnionPay App၊ UnionPay MobileWallet Connect စနစ် ချိတ်ဆက်ထားသော ဘဏ်လုပ်ငန်းသုံး App များနှင့် Alipay တို့ကို ယခုအခါ အသုံးပြုနိုင်ပြီဖြစ်သည်။ အလားတူပင်၊ အင်ဒိုနီးရှားနိုင်ငံမှ လာရောက်လည်ပတ်သူများသည်လည်း MyBCA၊ OVO၊ DANA၊ GoPay၊ Mandiri နှင့် ShopeePay ကဲ့သို့သော အင်ဒိုနီးရှားနိုင်ငံ၏ အဓိက အင်ဒိုနီးရှားဝေါလက် အမြောက်အမြားကို အသုံးပြု၍ တရုတ်ပြည်မကြီးရှိ UnionPay နှင့် Alipay QR စနစ်သုံး ကုန်သည်ဆိုင်ခန်းများတွင် ငွေပေးချေနိုင်မည် ဖြစ်သည်။

UnionPay အနေဖြင့် "ယုံကြည်စိတ်ချရသော ပူးပေါင်းဆောင်ရွက်မှုများ၊ အတူတကွ အောင်မြင်မှု" (Trusted Ties, Shared Success) ဟူသော မဟာဗျူဟာမြောက် မျှော်မှန်းချက်နှင့်အညီ ကမ္ဘာတစ်ဝန်းရှိ သုံးစွဲသူများအတွက် ပိုမိုအဆင်ပြေချောမွေ့သည့် ငွေပေးချေမှုစနစ်များကို ဆက်လက်တိုးမြှင့်သွားရန် သန္နိဋ္ဌာန်ချမှတ်ထားကြောင်း သိရှိရပါသည်။

ရင်းမြစ် - https://dagangnews.com