ကုန်အမှတ်တံဆိပ်မှတ်ပုံတင်ခြင်းဆိုင်ရာအသိပညာပေးဆွေးနွေးပွဲကို ရခိုင်ပြည်နယ် စီးပွားရေးရာဝန်ကြီး တက်ရောက်၍ အဖွင့်အမှာစကားပြောကြား

စစ်တွေမြို့၊ ဧပြီ ၃၀

ကုန်အမှတ်တံဆိပ်မှတ်ပုံတင်ခြင်းဆိုင်ရာ အသိပညာပေးဆွေးနွေးပွဲကို (၃၀-၄-၂၀၂၃) နံနက်ပိုင်း၌ ရခိုင်ပြည်နယ်၊ စစ်တွေမြို့ ဦးဥတ္တမခန်းမတွင် ကျင်းပရာ ရခိုင်ပြည်နယ်ဝန်ကြီးချုပ်ဦးထိန်လင်း တက်ရောက် အမှာစကား ပြောကြားခဲ့ပါသည်။

အဆိုပါ အသိပညာပေးဆွေးနွေးပွဲတွင် ပြည်နယ်ဝန်ကြီးများ၊ ပြည်နယ်တရားသူကြီးချုပ် ဒေါ်ဝါဝါထွန်း၊ မူပိုင်ခွင့်ဦးစီးဌာန ညွှန်ကြားရေးမှူးချုပ် ဒေါက်တာမိုးမိုးသွယ်၊ ညွှန်ကြားရေးမှူး ဒေါက်တာစိမ့်သန္တာထွန်း၊ ဌာနဆိုင်ရာတာဝန်ရှိသူများနှင့်အတူ လုပ်ငန်းရှင်များတက်ရောက်ကြကြောင်း သိရှိရသည်။

ရှေးဦးစွာ ရခိုင်ပြည်နယ်ဝန်ကြီးချုပ် ဦးထိန်လင်းက ယနေ့ဆွေးနွေးပွဲတွင် တက်ရောက်သူများ အနေဖြင့် ကုန်အမှတ် တံဆိပ်မှတ်ပုံတင်ခြင်းဆိုင်ရာ အသိပညာဗဟုသုတများနှင့် ကုန်အမှတ်တံဆိပ် မူပိုင်ခွင့် ဥပဒေနှင့်စပ်လျဉ်းပြီး သိရှိလိုသည်များ၊ ကုန်အမှတ်တံဆိပ်မူပိုင်ခွင့် လျှေက်ထားခြင်းဆိုင်ရာ များအပေါ် သိရှိလိုသည်များကို မေးမြန်းနိုင်ပြီး ရင်းနှီးပွင့်လင်းစွာ ဆွေးနွေးကြစေလိုကြောင်း၊ မြန်မာ နိုင်ငံရဲ့ ကုန်အမှတ်တံဆိပ်မူပိုင်ခွင့်မှတ်ပုံတင်စနစ် တည်ထောင်ခြင်းမှာလည်း ပေါ်ထွန်းလာပြီးဖြစ်သည့် အတွက် မိမိတို့သက်ဆိုင်ရာကဏ္ဍအလိုက် ပြည်သူတွေရဲ့အကျိုးစီးပွား တိုးတက်ဖြစ်ပေါ်ရေးအတူ ပူးပေါင်းပြီး အကောင်အထည်ဖော် ဆောင်ရွက်စေလိုကြောင်း ပြောကြားသည်။

ဆက်လက်ပြီး မူပိုင်ခွင့်ဦးစီးဌာန၊ ညွှန်ကြားရေးမှူးချုပ် ဒေါက်တာမိုးမိုးသွယ်က မူပိုင်ခွင့်ဥပဒေ အာဏာသက်ဝင်ခြင်း နှင့်စပ်လျဉ်း၍ ရှင်းလင်းပြောကြားပြီး မူပိုင်ခွင့်ဦးစီးဌာန၊ ညွှန်ကြားရေးမှူး ဒေါက်တာ စိမ့်သန္တာထွန်းက ကုန်အမှတ်တံဆိပ်မူပိုင်ခွင့်မှတ်ပုံတင်ခြင်းနှင့်ပတ်သက်၍ ရှင်းလင်းပြောကြားသည်။ ထို့နောက် ဥပဒေပညာရှင် ဦးသန်းမောင်က မူပိုင်ခွင့်ဥပဒေများနှင့် ပတ်သက်၍ ဆွေးနွေးပြီး တက်ရောက် လာကြသည့် လုပ်ငန်းရှင်များက သိရှိလိုသည်များကို မေးမြန်းကြရာ တာဝန်ရှိသူများက ပြန်လည်ဖြေကြား ကြကာ ဆွေးနွေးပွဲကို ရုပ်သိမ်းခဲ့ကြောင်း သတင်းရရှိသည်။