ကျော်ကြားသောအမှတ်တံဆိပ်အကြောင်း သိကောင်းစရာများ
ကျော်ကြားသောအမှတ်တံဆိပ်ဆိုသည်မှာ အမှတ်တံဆိပ်တစ်ခုဖြစ်သော်လည်း သာမန်အမှတ်တံဆိပ်မျိုးမဟုတ်ဘဲ၊ သုံးစွဲသူများ အကြားတွင် အခြားသော အမှတ်တံဆိပ်များထက် လူသိများပြီး ထင်ပေါ်ကျော်ကြားသည့် အမှတ်တံဆိပ်တစ်ခုဖြစ်ပါသည်။ ကျော်ကြားသော အမှတ်တံဆိပ်တစ်ခုသည် စတင်ဖန်တီးအသုံးပြုသည့်အချိန်၌ ကျော်ကြားမှုမျိုးမဟုတ်ဘဲ သာမန်အမှတ်တံဆိပ်ကို အချိန်ကာလတစ်ခုထိ အသုံးပြုနေခြင်းမှ အများပြည်သူကြား ကျော်ကြားသော အမှတ်တံဆိပ်ဖြစ်လာခြင်းဖြစ်ပါသည်။ အမှတ်တံဆိပ် တစ်ခုသည် သက်ဆိုင်ရာနယ်ပယ်တွင် ယင်းအမှတ်တံဆိပ်အား အသုံးပြုခဲ့သည့် အချိန်ကာလ၊ အများပြည်သူ၏ အသိအမှတ်ပြုမှု သို့မဟုတ် လူသိများမှုပမာဏ၊ မိမိအသုံးပြုထားသည့် အမှတ်တံဆိပ်အား အများပြည်သူသိရှိစေနိုင်ရန်အတွက် ကြော်ငြာခြင်း၊ ကုန်စည်ပြပွဲများတွင် ခင်းကျင်းပြသခဲ့ခြင်းများအပါအဝင် ရောင်းအားမြှင့်တင်ခြင်းအစရှိသည့် အချက်များကြောင့် ကျော်ကြားသော အမှတ်တံဆိပ်အဖြစ် သတ်မှတ်နိုင်မည်ဖြစ်ပြီး အဆိုပါစံနှုန်းများ၊ စည်းမျဉ်းများနှင့် ကိုက်ညီမှုရှိရန်လိုအပ်ပါသည်။
ကုန်အမှတ်တံဆိပ်မူပိုင်ခွင့်ဥပဒေ (၂၀၁၉) တွင်လည်း ကျော်ကြားသောအမှတ်တံဆိပ်နှင့် စပ်လျဉ်း၍ ပြဋ္ဌာန်းချက်ထည့်သွင်း ဖော်ပြထားပါသည်။ အမှတ်တံဆိပ်တစ်ခုသည် ယင်းအမှတ်တံဆိပ်ကို အသုံးပြုထားသည့် ကုန်ပစ္စည်း၏ အရည်အသွေးကို အချိန်ကာလ ကြာမြင့်စွာထိန်းသိမ်းထားနိုင်ခြင်း၊ ယင်းအမှတ်တံဆိပ်ကိုပင် တစ်ဆက်တည်းအသုံးပြုခဲ့ခြင်းကြောင့် သုံးစွဲသူများကြားတွင် လူသိများပြီး ထင်ရှားကျော်ကြားသော အမှတ်တံဆိပ်ဖြစ်လာသည့်အတွက် အကာအကွယ်ရရှိနိုင်သည့် အခွင့်အရေးမှာလည်း သာမန်အမှတ် တံဆိပ်ထက်ပိုမိုကျယ်ပြန့်ခြင်းဖြစ်ပါသည်။ ကျော်ကြားသော အမှတ်တံဆိပ်တစ်ခုသည် မှတ်ပုံမတင်ထားသော်လည်း ယင်းအမှတ် တံဆိပ်နှင့် ထပ်တူသို့မဟုတ် အလားတူဖြစ်သည့်အပြင် ကုန်ပစ္စည်း သို့မဟုတ် ဝန်ဆောင်မှုများမှာလည်း ထပ်တူသို့မဟုတ် အလားတူ ဖြစ်နေပါက ထိုသို့အသုံးပြုနေခြင်းအပေါ် ကန့်ကွက်နိုင်သည့် အခွင့်အရေးရရှိမည်ဖြစ်ပါသည်။
မှတ်ပုံတင်ထားသော ကျော်ကြားသောအမှတ်တံဆိပ်နှင့် ထပ်တူ သို့မဟုတ် အလားတူသော အမှတ်တံဆိပ်ကို အခြားသူတစ်ဦးဦးက မတူညီသော ကုန်ပစ္စည်းနှင့် ဝန်ဆောင်မှုများတွင် အသုံးပြုခြင်းသည် မှတ်ပုံတင်ထားသော ကျော်ကြားသောအမှတ်တံဆိပ်ပိုင်ရှင်၏ ကုန်ပစ္စည်းနှင့်ဝန်ဆောင်မှုတို့အကြား ဆက်နွယ်မှုရှိသည်ဟု ညွှန်းပြသကဲ့သို့ဖြစ်နိုင်ပြီး အကျိုးစီးပွားကိုလည်း ထိခိုက်နိုင်သောကြောင့် ထိုသို့အသုံးပြုခြင်းအပေါ် ကန့်ကွက်နိုင်မည်ဖြစ်ပါသည်။
(ကုန်အမှတ်တံဆိပ်မူပိုင်ခွင့်ဌာနခွဲ)