ကုန်အမှတ်တံဆိပ်မူပိုင်ခွင့်ဥပဒေ အာဏာသက်ဝင်ခြင်းနှင့်စပ်လျဉ်းသည့်ဆွေးနွေးပွဲသို့ စီးပွားရေးနှင့်ကူးသန်းရောင်း ဝယ်ရေးဝန်ကြီးဌာန၊ ဒုတိယဝန်ကြီး တက်ရောက်အမှာစကားပြောကြား
၂၀၂၃ ခုနှစ်၊ ဖေဖော်ဝါရီလ ၂၈ ရက်နေ့၊ နံနက် (၀၉:၃၀) နာရီအချိန် တွင် ရုံးအမှတ် (၃)၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၌ Hybrid စနစ်ဖြင့် ကျင်းပပြုလုပ်ခဲ့သည့် ကုန်အမှတ်တံဆိပ်မူပိုင်ခွင့်ဥပဒေ အာဏာသက်ဝင်ခြင်းနှင့် စပ်လျဉ်းသည့် ဆွေးနွေးပွဲသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ဒုတိယဝန်ကြီး ဦးညွန့်အောင် တက်ရောက်အမှာစကား ပြောကြားခဲ့သည်။
ဒုတိယဝန်ကြီးက အဖွင့်အမှာစကားပြောကြားရာတွင် မြန်မာနိုင်ငံသည် ကမ္ဘာ့ကုန်သွယ်ရေးအဖွဲ့နှင့် ကမ္ဘာ့မူပိုင်ခွင့်အဖွဲ့တို့ရဲ့ အဖွဲ့ဝင်နိုင်ငံဖြစ်တာနှင့်အညီ ကုန်သွယ်မှုနှင့်ဆက်စပ်သော မူပိုင်ခွင့်ဆိုင်ရာသဘောတူစာချုပ်ကို လိုက်နာဆောင်ရွက်ရန် တာဝန်ရှိ သလို အာဆီယံအဖွဲ့ဝင်နိုင်ငံဖြစ်သည့်အတွက် အရှေ့တောင်အာရှအဖွဲ့ဝင်နိုင်ငံများအကြား မူပိုင်ခွင့်ဆိုင်ရာပူးပေါင်းဆောင်ရွက်မှု သဘောတူညီချက်ကိုလည်း ပါဝင်ဆောင်ရွက်ရန် လိုအပ်ပါကြောင်း၊
ဒေသတွင်းနိုင်ငံများအနေဖြင့် ရင်းနှီးမြှုပ်နှံမှု၊ ကုန်စည်စီးဆင်းမှုများ တိုးတက်ဖို့နှင့် စီးပွားရေးဖွံ့ဖြိုးတိုးတက်မှုတို့ကို အထောက် အကူပြုနိုင်သည့် မူပိုင်ခွင့်စနစ်များကို ဖော်ဆောင်ကျင့်သုံးနေကြသည့်အတွက် မြန်မာနိုင်ငံအနေဖြင့် အခြားသောအဖွဲ့ဝင်နိုင်ငံများ နည်းတူ မူပိုင်ခွင့်ဥပဒေများကို အမြန်ဆုံးအကောင်အထည်ဖော်ဆောင်ရွက်ပြီး မူပိုင်ခွင့်အကာအကွယ်ပေးသည့် စနစ်တစ်ရပ် တည်ထောင်နိုင်ရန် ဆောင်ရွက်သွားရမှာဖြစ်ပါကြောင်း၊
၂၀၁၉ ခုနှစ်တွင် ပြဋ္ဌာန်းခဲ့သည့် မူပိုင်ခွင့်ဥပဒေ (၄) ခုအနက် ကုန်အမှတ်တံဆိပ်မူပိုင်ခွင့်ဥပဒေကို မကြာခင်ကာလတွင် စတင် အကောင်အထည်ဖော်ဆောင်ရွက်မည်ဖြစ်သည့်အတွက် အဓိကတာဝန်ယူရသော ဌာနများမှ ကိုယ်စားလှယ်များနှင့် သက်ဆိုင်သော ဌာနများမှ ကိုယ်စားလှယ်များအား အသိပညာ၊ ဗဟုသုတများ တိုးပွားစေပြီး လုပ်ငန်းချောမွေ့စေရန်အတွက် ဆွေးနွေးပွဲကျင်းပရခြင်း ဖြစ်ကြောင်း ပြောကြားခဲ့သည်။
မကြာခင်ကာလတွင်လည်း ပုဂ္ဂလိကကဏ္ဍမှ လုပ်ငန်းရှင်များ အသိပညာ၊ ဗဟုသုတများ တိုးပွားစေရန်အတွက် ရန်ကုန်မြို့၊ မန္တလေးမြို့ စသည့်မြို့ကြီးများတွင်လည်း ဆွေးနွေးပွဲများအား ဆက်လက်ကျင်းပသွားမည်ဖြစ်ပြီး ယခုဆွေးနွေးပွဲသို့ ကိုယ်စားလှယ် စုစုပေါင်း (၁၈၅)ဦး တက်ရောက်ခဲ့ကြကြောင်း သတင်းရရှိသည်။