ကူးသန်းရောင်းဝယ်ရေးနှင့် စားသုံးသူရေးရာဦးစီးဌာန၊ မန္တလေးတိုင်းဒေသကြီးဦးစီးမှူးရုံးနှင့် ဌာန ဆိုင်ရာများ ပူးပေါင်း၍ မန္တလေးမြို့ပေါ်ရှိ ဈေးကြီးများသို့ Mobile Lab ကားဖြင့် ကွင်းဆင်း စစ်ဆေး ဆောင်ရွက်လျက်ရှိ
လူတို့နေစဉ် စားသောက်နေသော အစားအသောက်များတွင် အရောင်ဆိုးဆေး အမျိုးမျိုးပါဝင် ပါတယ်။ ဆိုးဆေးကို သုတေသနပြုထားပြီး ခွင့်ပြုဆိုးဆေးနှင့် ခွင့်မပြု ဆိုးဆေးဟူ၍ ခွဲခြားထား ပါတယ်။ ခွင့်မပြု ဆိုးဆေး ပါဝင်သော အစားအသောက် များကို စားသုံးမိလျှင် ခန္ဓာကိုယ်ကြီးထွားမှုနှေးခြင်း၊ ဉာဏ်ရည် ဖွံ့ဖြိုးမှုနည်းခြင်း၊ အစာအိမ်အူလမ်းကြောင်း ကင်ဆာ၊ အသည်းကင်ဆာ များဖြစ်ပွားနိုင် ပါတယ်။ အစားအသောက်များ၌ အသုံးပြုသော ခွင့်ပြုဆိုးဆေးတွင် သဘာဝ ဆိုးဆေးနှင့် လူ လုပ်ဓါ တုဆိုးဆေး ဟူ၍ ထပ်မံခွဲခြား ထားပါတယ်။ သဘာဝဆိုးဆေးမှာ သစ်သီး၊ သစ်ဥ၊ သစ်ဖုများဖြင့်သာ ပြုလုပ်ထား တာကြောင့် တာရှည်မခံခြင်း၊ အရောင်မှာ သဘာဝ အရောင်ဖြစ်ခြင်းနှင့် ကုန်ကျစရိတ် များပါတယ်။ လူလုပ်ဓါ တုဆိုးဆေး ကတော့ တာရှည်ခံခြင်း၊ အရောင်လှခြင်း၊ ကုန်ကျစရိတ် သက်သာခြင်း တို့ကြောင့် လူအများဟာ အလွန်အန္တရာယ် ကြီးမားတဲ့ ဓါတုဆိုးဆေး များအား ပါဝင်သင့်သော အတိုင်းအတာထက် ပိုမိုသုံးစွဲလာကြပြီး ဓါတုပစ္စည်းများ ကိုလည်း သုံးစွဲလာကြ ပါတယ်။
ထို့အတူ သဘာဝကို ကျော်လွန်သော အလှကုန် ပစ္စည်းများ သုံးစွဲလာကြခြင်း၊ ဘေးအန္တရာယ်ရှိ အလှကုန် ပစ္စည်းများအား မည်သည့်အတွက်မ သုံးသင့်သည်ကို သုံးစွဲသူလူထုအတွင်း အသိပညာ ဗဟုသုတ နည်းပါးလာခြင်း၊ တခဏအလှအပ ကိုသာကြည့်ပြီး နောက်ဆက်တွဲ ဘေးအန္တရာယ် မတွေး ဆခြင်း၊ အလှကုန် ပစ္စည်းများတွင် အသုံးပြုသော Hydroquinone ဟာ ခွင့်ပြု ပမာဏထက် ကျော်လွန်ပါက အရေပြား ကင်ဆာဖြစ်နိုင်ခြင်း၊ အဖုအပိန့်များ ထွက်လာခြင်း၊ ခရုသင်းကဲ့သို့ အဖြူ ကွက် များဖြစ်ပေါ်လာခြင်း များကိုလည်း ယနေ့ပြည်သူလူထု အတွင်းမှာ တွေ့ရှိနေရပါတယ်။
ကူးသန်းရောင်းဝယ်ရေးနှင့် စားသုံးသူရေးရာ ဦးစီးဌာန၊ မန္တလေးတိုင်းဒေသကြီး ဦးစီးမှူးရုံးဟာ ပြည်သူလူထုအတွင်း နေ့စဉ် စားသောက်နေသော အစားအသောက်များ၊ သုံးစွဲနေသော အလှကုန် ပစ္စည်းများနှင့် ပတ်သက် ၍ဘေးကင်းလုံခြုံမှု ရှိစေရန် ဥပဒေအရ ကာကွယ်ပေးခြင်း၊ ကုန်ထုတ် စက်ရုံများ၊ စတိုးဆိုင်ကြီးများ၊ ဈေးကြီးများသို့ ကွင်းဆင်းစစ်ဆေးခြင်း၊ လူထုနှင့် တိုက်ရိုက်ထိတွေ့၍ အသိပညာ ဗဟုသုတပေးခြင်း၊ ပန်းဖလက်များ ဖြန့်ဝေခြင်း၊ မီဒီယာများမှ တဆင့် အသိပညာ ပေးခြင်းကိစ္စများကို အရှိန်အဟုန်ဖြင့် စဉ်ဆက်မပြတ် ဆောင်ရွက် လျက်ရှိရာ ကူးသန်းရောင်း ဝယ်ရေးနှင့် စားသုံးသူရေးရာ ဦးစီးဌာန၊ မန္တလေးတိုင်းဒေသကြီး ဦးစီးမှူးရုံးမှ ဝန်ထမ်းများသည် အစား အသောက်နှင့် ဆေးဝါး ကွပ်ကဲရေး ဦးစီးဌာန (နေပြည်တော်)၊ အစားအသောက်နှင့် ဆေးဝါး ကွပ်ကဲရေးဦးစီးဌာန (မန္တလေးရုံးခွဲ)၊ မန္တလေးမြို့တော် စည်ပင်သာယာရေးကော်မတီ၊ မန္တလေးတိုင်းဒသကြီး ကျန်းမာရေး ဦးစီးဌာနတို့ဖြင့် ပူးပေါင်းပြီး မန္တလေးမြို့ပေါ်ရှိ လူစည်ကား ရာဈေးကြီး များမှာ ၂၀၁၄ ခုနှစ် နိုဝင်ဘာလ ၂၈ ရက်မှ ဒီဇင်ဘာလ ၂ ရက်နေ့အထိ (၅) ရက်ဆက်တိုက် ကွင်းဆင်း၍ ဈေးများအတွင်းမှ အလှ ကုန်နှင့် အစားအသောက် ပစ္စည်းအမယ်စုံ (၃၇) မျိုးမှ နမူနာပစ္စည်းပေါင်း (၄၄၈) ခု ကောက်ယူ၍ Mobile Lab ကားဖြင့် ကုန်ပစ္စည်း နမူနာများတွင် ဆိုးဆေးနှင့် ဓါတုပစ္စည်း ပါဝင်မှုတို့ကို ပူးပေါင်းအဖွဲ့ များဖြင့်စစ်ဆေးဆောင် ရွက်ခဲ့ပါတယ်။
ထိုသို့ စစ်ဆေးရာတွင် အလှကုန်နှင့် အစားအသောက် ပစ္စည်းအမယ်ပေါင်း (၃၇) မျိုးမှ နမူနာ ပစ္စည်း (၄၄၈) ခု ကောက်ယူခဲ့ရာ၊ ပစ္စည်း (၂၈၀) ခုမှာ ဓါတ်ခွဲစစ်ဆေးပြီး (၁၆၈) ခုမှာ စစ်ဆေးဆဲဖြစ်ပါသည်။ ဓါတ်ခွဲစစ်ဆေးပြီး အစား အသောက် များတွင် နန်းရှေ့ဈေး၊ ဒေါ်--- (ပျံကျ) ဆိုင်မှ အမှတ်တံဆိပ်မပါ သရက်သီးချဉ်နှင့် ညောင်ပင်ဈေး ဒေါ်--- (ပျံကျ) ဆိုင်မှ အမှတ်တံဆိပ်မပါ ဝက်သားလုံးတို့တွင် တာရှည်ခံဓါတု ပစ္စည်းများ သုံးစွဲထားသည်ကို စစ်ဆေးတွေ့ရှိရကြောင်း အစား အသောက်နှင့် ဆေးဝါးကွပ်ကဲရေး ဦးစီးဌာနမှ ထုတ်ပြန်ထားကြောင်း သိရှိရပါတယ်။
မျိုးထွန်း (စားသုံးသူ၊ မန္တလေး)