မြန်မာနိုင်ငံနှင့် တရုတ်နိုင်ငံ၊ တဲဟုန်ပြည်နယ်ခွဲတို့အကြား နှစ်နိုင်ငံကုန်သွယ်မှုဆိုင်ရာ ညှိနှိုင်းအစည်းအဝေးတစ်ရပ်အား ကုန်သွယ်ရေးဦးစီးဌာန၊ ညွှန်ကြားရေးမှူးချုပ်၊ ဦးမြင့်သူရနှင့် တရုတ်ပြည်သူ့သမ္မတနိုင်ငံ၊ ယူနန်ပြည်နယ်၊ တဲဟုန်ပြည်နယ်ခွဲ၊ ပြည်သူ့အစိုးရ အုပ်ချုပ်ရေးမှူး၊ Mr. Wei Gang တို့မှ ဦးဆောင်၍ ၂၀၂၃ ခုနှစ်၊ ဇူလိုင်လ (၂၇)ရက်နေ့ ၊ နံနက် (၁၀:၀၀) နာရီအချိန်တွင် ရုံးအမှတ်(၃) နေပြည်တော်၌ ကျင်းပပြုလုပ်ခဲ့ပါသည်။
အစည်းအဝေးအား မြန်မာနိုင်ငံနှင့် တရုတ်နိုင်ငံ၊ တဲဟုန်ပြည်နယ်ခွဲတို့အကြား နှစ်နိုင်ငံကုန်သွယ်ရေးကိစ္စရပ်များအား ပိုမိုမြှင့်တင်ဆောင်ရွက်ရန် ရည်ရွယ်၍ကျင်းပခြင်းဖြစ်ပါသည်။
အစည်းအဝေးသို့ မြန်မာနိုင်ငံဘက်မှ ကုန်သွယ်ရေးဦးစီးဌာန၊ ညွှန်ကြားရေးမှူးချုပ် ဦးမြင့်သူရ ဦးဆောင်၍ ဒုတိယညွှန်ကြားရေးမှူးချုပ်များဖြစ်သော ဦးသိန်းထွန်းဦး၊ ဦးဝင်းလွင်နှင့်တကွ သက်ဆိုင်ရာ ညွှန်ကြားရေးမှူးများ၊ ဘာသာရပ်တာဝန်ခံများ တက်ရောက်ပြီး တရုတ်နိုင်ငံဘက်မှ ယူနန်ပြည်နယ်၊ တဲဟုန်ပြည်နယ်ခွဲ၊ ပြည်သူ့အစိုးရ အုပ်ချုပ်ရေးမှူး Mr. Wei Gang ဦးဆောင်၍ ကိုယ်စားလှယ် (၇)ဦးတို့ တက်ရောက်ခဲ့ကြပါသည်။
အစည်းအဝေးတွင် နှစ်နိုင်ငံကြား နယ်စပ်ဂိတ်များတိုးမြှင့်ဖွင့်လှစ်နိုင်ရေးကိစ္စ၊ မူဝါဒပိုင်းဆိုင်ရာကိစ္စရပ်များ၊ ကုန်စည်စီးဆင်းမှုလျင်မြန်ချောမွေ့စေရေးကိစ္စများ၊ ဘဏ္ဍာရေးဆိုင်ရာပူးပေါင်းဆောင်ရွက်မှုကိစ္စများ၊ လယ်ယာစိုက်ပျိုးရေးဆိုင်ရာကဏ္ဍများတွင် နှစ်နိုင်ငံ ပိုမိုပူးပေါင်းဆောင်ရွက် ရေးကိစ္စနှင့် နှစ်နိုင်ငံကြား ပို့ကုန်တိုးမြှင့်နိုင်ရေးကိစ္စများကို ဆွေးနွေးခဲ့ကြပြီး အစည်းအဝေးအား နေ့လည် ( ၁၃ : ၂၀ ) နာရီအချိန်တွင် အောင်မြင်စွာ ရုတ်သိမ်းခဲ့ပါသည်။