နေပြည်တော်၊ မေလ ၁၇
တီထွင်မှုမူပိုင်ခွင့်ဆိုင်ရာ အသိပညာပေးဆွေးနွေးပွဲကို ယနေ့နံနက် ၁၀ နာရီအချိန်တွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ မူပိုင်ခွင့်ဦးစီးဌာန၊ ရုံးအမှတ် (၅၂)၊ အစည်းအဝေးခန်းမ၌ ကျင်းပရာ မူပိုင်ခွင့်ဦးစီးဌာန ညွှန်ကြားရေးမှူးချုပ်က အဖွင့်အမှာ စကားပြောကြားသည်။
အဆိုပါ တီထွင်မှုမူပိုင်ခွင့်ဆိုင်ရာအသိပညာပေးဆွေးနွေးပွဲသို့ ဖိတ်ကြားထားသည့် ဝန်ကြီးဌာနများမှ ညွှန်ကြားရေးမှူးချုပ်များ၊ ဒုတိယညွှန်ကြားရေးမှူးများ၊ ညွှန်ကြားရေးမှူးများ၊ အရာထမ်း ကိုယ်စားလှယ်များနှင့် အဖွဲ့အစည်းများမှ တာဝန်ရှိသူများ၊ မူပိုင်ခွင့်ဦးစီးဌာနမှ ညွှန်ကြားရေးမှူးများနှင့် တာဝန်ရှိသူများ စုစုပေါင်း(၁၂၀)ဦးခန့် တက်ရောက်ကြသည်။
အဆိုပါ အသိပညာပေးဆွေးနွေးပွဲတွင် ညွှန်ကြားရေးမှူးချုပ် ဒေါက်တာမိုးမိုးသွယ်က အဖွင့်အမှာစကားပြောကြားရာ၌ မြန်မာနိုင်ငံတွင် အကောင်အထည်ဖော်ဆောင်ရွက်နေသည့် မူပိုင်ခွင့်အမျိုးအစားများထဲမှ တီထွင်မှုမူပိုင်ခွင့်စနစ်အကြောင်းကို သိရှိနိုင်စေရန်နှင့် တီထွင်မှုမူပိုင်ခွင့်စနစ်ကို ထိထိရောက်ရောက်အသုံးချပြီး နိုင်ငံဖွံ့ဖြိုးတိုးတက်စေရေးဆောင်ရွက်နိုင်ရန် ရည်ရွယ် ကျင်းပရခြင်းဖြစ်ပါကြောင်း၊ တီထွင်မူပိုင်ခွင့်စနစ်သည် တီထွင်ဖန်တီးနိုင်မှုကို အားပေးခြင်းဖြင့် ဆန်းသစ်တီထွင်မှုများတိုးတက်ရုံသာမက မြန်မာနိုင်ငံ၏ စီးပွားရေးတိုးတက်မှုနှင့် ဖွံ့ဖြိုးတိုးတက်မှုအတွက် ထောက်ပံ့ပေးနိုင်ခြင်း၊ တီထွင်မှုမူပိုင်ခွင့်စနစ်ကို ကျင့်သုံးဆောင်ရွက်နိုင်ပါက တီထွင်မှုများကို အကာအကွယ်ပေးနိုင်ခြင်း၊ နည်းပညာ၊ ရင်းနှီးမြှုပ်နှံမှု၊ ကုန်သွယ်ရေးနှင့်ကူးသန်းရောင်းဝယ်ရေးလုပ်ငန်းများ ဖွံ့ဖြိုးတိုးတက်နိုင်ခြင်း၊ အလုပ်အကိုင်အခွင့်အလမ်းများ များပြားလာနိုင်ခြင်း၊ ပြည်သူများ၏ အကျိုးစီးပွားများ မြင့်မားတိုးတက်လာနိုင်ခြင်းစသည့် အကျိုးကျေးဇူးများ ရရှိလာနိုင်မည်ဖြစ်ပါကြောင်း၊
မြန်မာနိုင်ငံတွင် တီထွင်မှုမူပိုင်ခွင့်ဥပဒေကို ကမ္ဘာ့ကုန်သွယ်မှုအဖွဲ့(World Trade Organization) ၏ မူပိုင်ခွင့်အခွင့်အရေးများဆိုင်ရာ သဘောတူစာချုပ်(Trade Related Aspects of Intellectual Property Rights–TRIPs)၏ အနိမ့်ဆုံးသတ်မှတ်ချက်များနှင့်အညီ ရေးဆွဲပြဋ္ဌာန်းထားပြီး TRIPs သဘောတူစာချုပ်ပါ ဖြေလျော့မှုများကို နိုင်ငံ၏ စီးပွားရေး၊ လူမှုရေးနှင့် ဖွံ့ဖြိုးတိုးတက်မှု အခြေအနေများနှင့်လျော်ညီစွာ အသုံးပြုနိုင်ရေး ထည့်သွင်းပြဋ္ဌာန်းထားပါကြောင်း၊ တီထွင်မှု မူပိုင်ခွင့်ဥပဒေပါ TRIPS ဖြေလျော့မှုများကို သိရှိနားလည်ပြီး နိုင်ငံဖွံ့ဖြိုးတိုးတက်ရေးကို အထောက်အကူဖြစ်စေမည့် အသုံးပြုမှုများ အထူးသဖြင့် ဆေးဝါး၊ ကုန်ထုတ်လုပ်မှုနှင့် စိုက်ပျိုးရေးကဏ္ဍများတွင် ပြည်ပနည်းပညာများ ရယူအသုံးပြုနိုင်ရေး၊ ဆေးဘက်ဆိုင်ရာသုတေသနများကို ထောက်ပံ့ပေးနိုင်ရေး၊ နိုင်ငံတော်အတွက် မရှိမဖြစ်လိုအပ်မည့် ဆေးဝါးများရရှိစေရေးနှင့် ပြည်သူ့ကျန်းမာရေးကို အထောက်အပံ့ဖြစ်စေမည့် အစီအစဉ်များ ချမှတ်နိုင်ရေးတို့အတွက် ဆောင်ရွက်စေလိုပါကြောင်း ပြောကြားခဲ့သည်။
ဆက်လက်၍ မူပိုင်ခွင့်ဦးစီးဌာန ညွှန်ကြားရေးမှူး ဒေါက်တာပွင့်ဖြိုးဝင်းက မြန်မာနိုင်ငံ တီထွင်မှုမူပိုင်ခွင့်စနစ်နှင့်စပ်လျဉ်း၍ လည်းကောင်း၊ တီထွင်မှုမူပိုင်ခွင့်စနစ်ကို ထိရောက်စွာအသုံးပြုခြင်းနှင့်စပ်လျဉ်း၍ လည်းကောင်း ရှင်းလင်းဆွေးနွေးပြောကြားခဲ့သည်။ ထို့နောက် ဆွေးနွေးပွဲသို့ တက်ရောက်လာသူများက သိရှိလိုသည်များကို မေးမြန်းခြင်းများအပေါ် ဘာသာရပ်တာဝန်ခံက ပြန်လည်ရှင်းလင်းဖြေကြားခဲ့ပြီး ဆွေးနွေးပွဲကို ရုပ်သိမ်းခဲ့ကြောင်း သတင်းရရှိသည်။