ကုန်သွယ်ရေးဦးစီးဌာန၊ ဒုတိယညွှန်ကြားရေးမှူးချုပ် ထိုင်းစီးပွားရေးလုပ်ငန်းရှင်များနှင့် တွေ့ဆုံပွဲသို့ တက်ရောက်ဆွေးနွေးခဲ့မှု

   ၂၀၂၄ ခုနှစ်၊ ဇွန်လ ၂၀ ရက်၊ ရန်ကုန်မြို့ရှိ Pan Pacific Hotel ၌ ကျင်းပသည့် “Myanmar Update 2024, Update in Law: Navigating the Latest Changes in Myanmar”တွေ့ဆုံဆွေးနွေးပွဲသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာန၊ ဒုတိယညွှန်ကြားရေးမှူးချုပ် ဦးသိန်းထွန်းဦး ဦးဆောင်၍ ကုန်သွယ်ရေးဦးစီးဌာနမှ ဘာသာရပ်ဆိုင်ရာတာဝန်ခံများဖြစ်သော ညွှန်ကြားရေးမှူး- ဦးအောင်မင်းသိုက်၊ ညွှန်ကြားရေးမှူး- ဒေါ်ချိုသက်မူ တို့ တက်ရောက်ဆွေးနွေးခဲ့ပါသည်။

     အဆိုပါ တွေ့ဆုံဆွေးနွေးပွဲအား မြန်မာနိုင်ငံ၌ ရင်းနှီးမြှုပ်နှံမှုလုပ်ငန်းများကို လာရောက်လုပ်ကိုင်လျက်ရှိသည့် ထိုင်းစီးပွားရေးလုပ်ငန်းရှင်များက စုစည်းကျင်းပခဲ့ခြင်းဖြစ်ပြီး မြန်မာနိုင်ငံဆိုင်ရာ ထိုင်းသံရုံး အကြီးအကဲနှင့် တာဝန်ရှိပုဂ္ဂိုလ်များ၊ ရင်းနှီးမြှုပ်နှံမှုနှင့်နိုင်ငံခြားစီးပွားဆက်သွယ်ရေးဝန်ကြီးဌာန၊ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနမှ အဆင့်မြင့်အရာရှိကြီးများ၊ မြန်မာနိုင်ငံ၊ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်မှ တာဝန်ရှိပုဂ္ဂိုလ်များ၊ ထိုင်းနိုင်ငံနှင့် မြန်မာနိုင်ငံတို့ရှိ ကုန်သည်စီးပွားရေးလုပ်ငန်းရှင်များ၊ ပို့ကုန်/သွင်းကုန် လုပ်ငန်းများကို ဆောင်ရွက်လျက်ရှိသည့် ကုမ္ပဏီလုပ်ငန်းရှင်ကြီးများ စုစုပေါင်း (၈၀)ဦးခန့် ပါဝင်တက်ရောက်ခဲ့ကြပါသည်။

     တွေ့ဆုံဆွေးနွေးပွဲ၌ ဌာနဆိုင်ရာ တာဝန်ရှိသူများက ကုန်သွယ်ရင်းနှီးမြှုပ်နှံမှုဆိုင်ရာ အချက်အလက်များကို အကျယ်တဝင့် ရှင်းလင်းဆွေးနွေးပေးခဲ့ကြပြီး ထိုင်းစီးပွားရေး ကုန်သည်လုပ်ငန်းရှင်များက သိရှိမေးမြန်းလိုသည်အချက်များနှင့် အခြားသိရှိလိုသည့်အချက်များကို ရင်းနှီးပွင့်လင်းစွာဖြင့် အပြန်အလှန် ဆွေးနွေးခဲ့ကြပါသည်။