၂၀၂၄ ခုနှစ်၊ ဇွန်လ၂၁ ရက်နေ့နှင့် ၂၂ ရက်နေ့တို့တွင် ရန်ကုန်မြို့ရှိ Melia Hotel ၌ ကျင်းပသည့် “Indonesia Expo 2024” အခမ်းအနားသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာန၊ ညွှန်ကြားရေးမှူးချုပ် ဦးမြင့်သူရ ဦးဆောင်၍ ကုန်သွယ်ရေးဦးစီးဌာနမှ ဘာသာရပ်ဆိုင်ရာ တာဝန်ခံများဖြစ်သော ညွှန်ကြားရေးမှူး- ဦးအောင်မင်းသိုက်၊ ညွှန်ကြားရေးမှူး- ဒေါ်ချိုသက်မူ တို့ တက်ရောက်ခဲ့ပါသည်။
အဆိုပါ ကုန်စည်ပြပွဲအခမ်းအနားအား မြန်မာနိုင်ငံဆိုင်ရာ အင်ဒိုနီးရှားသံအမတ်ကြီးနှင့် တာဝန်ရှိပုဂ္ဂိုလ်များ၊ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနမှ အဆင့်မြင့်အရာရှိကြီးများ၊ မြန်မာနိုင်ငံ ကုန်သည်များနှင့် စက်မှုလက်မှုလုပ်ငန်းရှင်များအသင်းချုပ်မှ တာဝန်ရှိပုဂ္ဂိုလ်များ၊ မန္တလေးတိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်းမှ တာဝန်ရှိပုဂ္ဂိုလ်များ၊ အင်ဒိုနီးရှားနိုင်ငံနှင့် မြန်မာနိုင်ငံတို့ရှိ ကုန်သည်စီးပွားရေးလုပ်ငန်းရှင်များ၊ ပို့ကုန်/သွင်းကုန် လုပ်ငန်းများကို ဆောင်ရွက်လျက်ရှိသည့် ကုမ္ပဏီလုပ်ငန်းရှင်ကြီးများ စုစုပေါင်း (၈၀)ဦးခန့် ပါဝင်တက်ရောက်ခဲ့ကြပါသည်။
ကုန်စည်ပြပွဲအခမ်းအနား၌ ဌာနဆိုင်ရာတာဝန်ရှိသူများက ကုန်သွယ်ရင်းနှီးမြှုပ်နှံမှုဆိုင်ရာ အချက်အလက်များကို အကျယ်တဝင့် ရှင်းလင်းဆွေးနွေးပေးခဲ့ကြပြီး အင်ဒိုနီးရှားစီးပွားရေး ကုန်သည်လုပ်ငန်းရှင်များက သိရှိမေးမြန်းလိုသည့်အချက်များနှင့် အခြားသိရှိလိုသည့်အချက်များကို ရင်းနှီးပွင့်လင်းစွာဖြင့် အပြန်အလှန် ဆွေးနွေးခဲ့ကြပါသည်။