မကွေးတိုင်းဒေသကြီး၊ မကွေးခရိုင်၊ တောင်တွင်းကြီးမြို့နယ်အတွင်းရှိ ပျားတု(ရွာမ)၊ ပျားတု (ရှေ့)၊ ပျားတု(နောက်) စသည့်ကျေးရွာများ၌ လယ်ယာလုပ်ငန်းကို အဓိကလုပ်ကိုင်လျက်ရှိရာ ကြက်သွန်နီ၊ နှမ်း၊ စပါးနှင့် ပဲမျိုးစုံသီးနှံများကို အဓိကစိုက်ပျိုးကြပြီး စားဖိုဆောင်သုံးသီးနှံ တစ်မျိုး ဖြစ်သည့် ငရုတ်သီးနှံကို စိုက်ဧက ၁၀၀ ခန့် စိုက်ပျိုးထားကြောင်း သိရသည်။
ငရုတ်သီးနှံကို မေလတွင်ပျိုးထောင်၍ ဇွန်လတွင် မြေချစိုက်ပျိုးကြပြီး စက်တင်ဘာလတွင် ခူးဆွတ်ရကြောင်း၊ မျိုးအနေဖြင့် သာမို-၉၀၀ ငရုတ်မျိုးနှင့် သာမို-၉၉၉ ငရုတ်မျိုးများကို စိုက်ပျိုးကြ ကြောင်း၊ စိုက်ပျိုးရာတွင် ငရုတ်မျိုးစေ့များကို ပျိုးအိတ်ဖြင့် ပျိုးထောင်ကာ ပျိုးပင်တစ်လသားခန့် အရွယ်တွင် မြေချ၍မြေအောက် ရေတင်စနစ်ဖြင့် စိုက်ပျိုးကြကြောင်း၊ စိုက်ပျိုးထုတ်လုပ်မှုအတွက် မျိုး၊သွင်းအားစု၊ လုပ်သားခအပါအဝင် တစ်ဧကလျှင် ငွေကျပ် ၁,၇၀၀,၀၀၀ ခန့်ကုန်ကျပြီး ပိဿာ ၈၀၀-၁၀၀၀ ခန့်ထွက်ရှိကြောင်း၊ စက်တင်ဘာလ၊ ပထမပတ် ဈေးနှုန်းအနေဖြင့် ငရုတ်သီးစိမ်း လက်ကားဈေး တစ်ပိဿာလျှင် ငွေကျပ် ၄,၀၀၀-၄,၅၀၀ ဖြင့် ရောင်းချရပြီး အကျိုးအမြတ်အနေဖြင့် ငွေကျပ် ၁,၅၀၀,၀၀၀ ခန့်ရရှိကြောင်း၊ ဈေးကွက်အနေဖြင့် တောင်တွင်းကြီးမြို့၊ မြို့သစ်မြို့နှင့် မကွေးမြို့တို့ရှိ ကုန်စိမ်းဒိုင်များသို့ တင်ပို့ရောင်းချကြောင်း၊ ယခုနှစ်တွင် ငရုတ်သီးနှံအထွက်နှုန်း ကောင်းမွန်ပြီး ဈေးကောင်းရရှိသောကြောင့် တောင်သူများ အကျိုးအမြတ်ရရှိကြောင်း သိရှိရသည်။
DOCA (မကွေး)