ပြည်ထောင်စု ကုန်ဈေးနှုန်းတည်ငြိမ်ရေးကော်မတီ ဥက္ကဋ္ဌက ပြည်တွင်းစားသုံးဆီဈေးနှုန်း ကျဆင်းရေးအတွက် ညှိနှိုင်းအစည်းအဝေးကျင်းပခြင်း

ရန်ကုန်၊ ဇူလိုင် ၁ ရက်

              ပြည်ထောင်စု ကုန်ဈေးနှုန်းတည်ငြိမ်ရေးကော်မတီ ဥက္ကဋ္ဌ၊ စီးပွားရေးနှင့်ကူးသန်း ရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးအောင်နိုင်ဦးသည် ယနေ့ နေ့လည်ပိုင်းတွင် စားသုံးသူရေးရာဦးစီးဌာန၊ ရန်ကုန်တိုင်းဒေသကြီး ဦးစီးမှူးရုံး၊ အစည်းအဝေးခန်းမ၌  မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်း ဥက္ကဋ္ဌနှင့် အဖွဲ့ဝင်များ၊ စားသုံးဆီ တင်သွင်းဖြန့်ဖြူးနေသည့် ကုမ္ပဏီများနှင့်တွေ့ဆုံ၍ စားသုံးဆီတင်သွင်းခြင်း၊  သိုလှောင်ခြင်း၊ ဈေးကွက်ဖြန့်ဖြူးခြင်း ဆိုင်ရာ လုပ်ငန်းစဉ်များစနစ်တကျရှိစေရေးနှင့်  ပြည်တွင်း စားသုံးဆီဈေးနှုန်း တည်ငြိမ်ကျဆင်းစေရေး အစီအစဉ်များနှင့်စပ်လျဉ်း၍ ညှိနှိုင်းဆွေးနွေးခဲ့ပါသည်။

              အစည်းအဝေးတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး  ဦးအောင်နိုင်ဦးက ယမန်နေ့က ကျင်းပခဲ့သော နိုင်ငံ့စီးပွားမြှင့်တင်ရေးအစည်းအဝေးတွင် နိုင်ငံတော်ဝန်ကြီးချုပ်က လမ်းညွှန်ခဲ့သည်များအား ရှင်းလင်းပြောကြား ပါသည်။ ထို့နောက် ပြည်ထောင်စုဝန်ကြီးက စားသုံးဆီများ ပြည်ပမှတင်သွင်းရာတွင် စနစ်တကျရှိစေရေးနှင့် ဈေးကွက်သို့ ဖြန့်ဖြူးရောင်းချရာတွင်လည်း သင့်တင့်မျှတသည့်ဈေးနှုန်း ဖြစ်ရေးအတွက် စားသုံးဆီ တင်သွင်းသည့် ကုမ္ပဏီများအနေဖြင့် ချမှတ်ထားသည့် စည်းကမ်းသတ်မှတ်ချက်များနှင့်အညီ ဖြန့်ဖြူးရောင်းချရေးတို့နှင့်ပတ်သက်၍ အသေးစိတ် ဆွေးနွေးပြောကြားပါသည်။

       ထို့နောက် အစည်းအဝေးသို့တက်ရောက်လာကြသည့် စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေး ကော်မတီအဖွဲ့ဝင်များနှင့် စားသုံးဆီတင်သွင်းသည့်ကုမ္ပဏီများက စားသုံးဆီတင်သွင်းရောက်ရှိမည့် အခြေအနေ များနှင့် ဈေးကွက်လိုအပ်ချက်ကို ပြည့်မီအောင်ဖြည့်ဆည်းပေးနိုင်ရေးနှင့် သတ်မှတ်ဈေးနှုန်းအတိုင်း ဈေးကွက်သို့ဖြန့်ဖြူးရောင်းချရေး စီမံဆောင်ရွက်သွားမည့်အခြေအနေများကို ဝိုင်းဝန်းဆွေးနွေးတင်ပြခဲ့ကြပြီး ပြည်ထောင်စုဝန်ကြီးမှ လိုအပ်ချက်များကို လမ်းညွှန်ဆွေးနွေးခဲ့ကြောင်း သတင်းရရှိပါသည်။