Monthly Archive

            ၂၀၁၀-၂၀၁၁ဘဏ္ဍာနှစ်တွင် ပင်လယ်ရေကြောင်းကုန်သွယ်မှုမှ ရေထွက်ကုန်ပစ္စည်း တင်ပို့နိုင်မှုမှာ တန်ဖိုး အမေရိကန်ဒေါ်လာ (၂၈၇)သန်းကျော်၊ ၂၀၁၁-၂၀၁၂ဘဏ္ဍာနှစ်တွင် တန်ဖိုးအမေရိကန်ဒေါ်လာ (၄၅၁)သန်းကျော် တင်ပို့နိုင်ခဲ့သဖြင့် ကာလတူထက်တန်ဖိုး(၁၄၆)သန်းကျော် ပိုမိုတိုးမြှင့် တင်ပို့ခဲ့သည်ကို တွေ့ရှိရပါသည်။ ငါးတင်ပို့မှုမှ နေ၍ (၁၃၈)သန်းကျော် ၊ ပုစွန်တင်ပို့မှုမှ (၉)သန်းကျော်၊ အခြားရေထွက်ပစ္စည်းတင်ပို့မှုမှာ (၁၆)သန်းကျော် အသီးသီး တိုးမြှင့်တင်ပို့နိုင်ခဲ့သည်ကိုတွေ့ရှိရပါသည်။ ငါးတင်ပို့မှုဈေးကွက်အနေဖြင့် ၂၀၁၁-၂၀၁၂ဘဏ္ဍာနှစ်တွင် တရုတ်နိုင်ငံသို့ (၅၃.၁၉%) ဖြင့် ပထမအများဆုံး၊ ကူဝိတ်နိုင်ငံသို့ (၁၄.၁၄%)ဖြင့် ဒုတိယအများဆုံး ၊ ဆောဒီအာရေးဗီးယားနိုင်ငံသို့ (၇.၇၀%)ဖြင့် တတိယအများဆုံး၊ စင်္ကာပူနိုင်ငံသို့ (၆.၁၈%)ဖြင့် စတုတ္ထအများဆုံး၊ ယူအေအီးနိုင်ငံသို့ (၅.၆၇%)ဖြင့် ပဉ္စမအများဆုံး၊ မလေးရှားနိုင်ငံသို့ (၅.၀၁%)ဖြင့် ဆဌမအများဆုံး အသီးသီးတင်ပို့နိုင်ခဲ့သည်ကို တွေ့ရှိရပါသည်။ ရေချို ငါးတင်ပို့မှုအနေဖြင့် ယခင်နှစ်ကာလတူထက် ပိုမိုတိုးမြှင့်တင်ပို့နိုင်ခဲ့ပြီး ရေချိုငါးအမျိုးအစားများတွင် အဓိကအများဆုံး တင်ပို့နေသော ငါးမြစ်ချင်းအား အရှေ့အလယ်ပိုင်း ဈေးကွက်ဖြစ်သည့် ကူဝိတ်နှင့် ဆော်ဒီအာရေးဗီးယားနိုင်ငံများသို့ အများဆုံးတင်ပို့လျှက်ရှိပါသည်။ ယခုအချိန်တွင် အရှေ့အလယ်ပိုင်းနိုင်ငံများ၌ နိုင်ငံရေးမငြိမ်မသက်ဖြစ်နေပြီး ဝယ်လိုအား ကျဆင်းလျှက်ရှိနေခြင်း၊ ပြည်တွင်းငါးမွေးမြူရေးကန်များမှ ထွက်ရှိသည့် ငါးများ ဈေးကွက်အတွင်း ဝင်ရောက်လာမှု များပြားနေသောကြောင့် ရောင်းလိုအားများပြီး ဝယ်လိုအားနည်းနေသဖြင့် ဈေးကွက်ငြိမ်သက်ပြီး ရေချိုငါးတင်ပို့မှု အနည်းငယ်လျော့ကျလာနိုင်ပါသည်။ ရေချိုငါးမွေးမြူရေးအနေဖြင့် အရှေ့အလယ်ပိုင်းဈေးကွက်တစ်ခုတည်းကိုသာ တင်ပို့ နိုင်ပြီး ကာလရှည်မွေးမြူရသည့် ငါးမြစ်ချင်းတစ်မျိုးတည်းကိုသာ အဓိကထား မွေးမြူခဲ့ကြသဖြင့် အရှေ့အလယ်ပိုင်း ဈေးကွက်မှ ဝယ်လိုအား လျော့နည်းလာချိန်တွင် ငါးမွေးမြူသူများအခက်အခဲဖြစ်ပေါ်ခဲ့သဖြင့် ယခုအချိန်တွင် ရေချိုငါး ထုတ်လုပ်တင်ပို့ရောင်းချသူ ကုမ္ပဏီလုပ်ငန်းရှင်းများနှင့် သက်ဆိုင်ရာအသင်းအဖွဲ့များ ပူးပေါင်း၍ ဈေးကွက်အမျိုးမျိုးမှ ကြိုက်နှစ်သက်ပြီး ကာလတိုမွေးမြူနိုင်၍ ဈေးကောင်းရရှိသော ကကတစ်၊ တီလားဗီးယားနှင့် ငါးရံ့တို့အား ပြောင်းလဲ မွေးမြူ၍ ခိုင်မာသည့်ဈေးကွက်တစ်ခု တည်ဆောက်နိုင်ရေး ပူးပေါင်းဆောင်ရွက်လျှက်ရှိကြောင်းသိရှိရပါသည်။ ရေငန်ငါး တင်ပို့မှုအနေဖြင့် အိမ်နီးချင်း တရုတ်နိုင်ငံနှင့် စင်္ကာပူနိုင်ငံ များသို့ အဓိကထားတင်ပို့လျှက်ရှိပါသည်။ ရေလုပ်ငန်းကဏ္ဍ အတွက် တိုးတက်ဆောင်ရွက်နိုင်မည့် အလားအလာများရှိနေပြီး ငါးတင်ပို့မှုဈေးကွက်ကြီးဖြစ်သည့် ဥရောပဈေးကွက် အား ထိုးဖောက်ယှဉ်ပြိုင်နိုင်ရန်အတွက် အားသာချက်နှင့် အလားအလာကောင်းများ ရှိနေပြီးဖြစ်သဖြင့် ရှေ့ဆက်၍ မြန်မာ့ရေထွက်ပစ္စည်း တင်ပို့နိုင်မှုကဏ္ဍမှနေ၍ နိုင်ငံတော်အတွက် နိုင်ငံခြားဝင်ငွေများ ပိုမိုတိုးမြှင့်ရှာဖွေပေးနိုင်မည်ဖြစ် ပါသည်။

                                                                                                                                                    မောင်မောင်လွင် (ပို့ကုန်)

       အခြားလယ်ယာထွက်ကုန်ပစ္စည်းတစ်မျိုးဖြစ်သော မကျည်းသီးအား ပြည်ပသို့ တင်ပို့လျှက်ရှိရာ 2011-2012 ဘဏ္ဍာနှစ်တွင် ပင်လယ်ရေကြောင်းမှ အမေရိကန်ဒေါ်လာ ၉ သန်းကျော်ဘိုး တင်ပို့နိုင်ခဲ့သဖြင့် (၁၀)နှစ်တာကာလ အတွင်း အမြင့်ဆုံး တင်ပို့နိုင်ခဲ့ခြင်း ဖြစ်ကြောင်း စာရင်းဇယားများအရ သိရှိရပါသည်။ မကျည်းသီးအား ပြည်တွင်း၌ဟင်းချက်ရာတွင် ဟင်းအနှစ်ရစေရန်နှင့် အချဉ်ဓါတ်ရစေရန် ထည့်သွင်း ချက်ပြုတ်ခြင်း၊ တိုင်းရင်းဆေးဝါးများ ဖော်စပ်ရာတွင် ကုန်ကြမ်းအဖြစ်ထည့်သွင်းအသုံးပြုခြင်း၊ မကျည်းပလိပ်၊ မကျည်းယို ၊မကျည်းဖျော်ရည်စသည်ဖြင့် အစားအသောက်များ ပြုလုပ်သုံးစွဲကြသော်လည်း မြန်မာနိုင်ငံအနှံအပြား တွင် ပေါက်ရောက်ဖြစ်ထွန်းခြင်း ပြည်တွင်းစားသုံး ပိုလျှံမှု ရှိခြင်းတို့ကြောင့် ပြည်ပသို့တင်ပို့ရောင်းချခဲ့ရာ အင်ဒိုနီးရှား၊ ပါကစ္စတန်၊ မလေးရှားနှင့် စင်္ကာပူနိုင်ငံများသို့ အများဆုံး တင်ပို့လျှက်ရှိကြောင်း သိရှိရပါသည်။ စိုက်ပျိုးရှင်သန်ပြီးသည်နှင့် မည်သည့်သွင်းအားစုမျှ ထည့်သွင်းရန် မလိုသော နှစ်ရှည်စားပင် မှ နိုင်ငံခြားဝင် ငွေများ တစ်နှစ်ထက်တစ်နှစ် တိုးတက်ရှာဖွေပေးလျှက်ရှိသဖြင့် အရင်းအနှီးမများသော စိုက်ပျိုးရ လွယ်ကူသော မကျည်းပင်များအား တိုးချဲ့စိုက်ပျိုးခြင်းဖြင့် ပြည်ပဝင်ငွေများ တိုးတက်ရရှိနိုင်ပါကြောင်း သတင်းကောင်းပါး ရေးသားတင်ပြအပ်ပါသည်။

                                                                                                                                            ဟေမာန်ဝင်း (ပို့ကုန်)

        မြန်မာနိုင်ငံတွင် ပြည်ပမှ ကုန်ကြမ်းပေး ကုန်ချောယူစနစ်ဖြင့် လက်ခစားလုပ်ငန်းဆောင်ရွက်သော (CMP) လုပ်ငန်းများကို ဆောင်ရွက် ခွင့်ပြုပေးလျှက်ရှိရာ အထည်ချုပ်လုပ်ငန်း၊ ဖိနပ်ချုပ်လုပ်ငန်း၊ မှန်ဘီလူး လုပ်ငန်း၊ ထရန်စဖော်မာ အပိုပစ္စည်းများ၊ ဆေးဘက်ဆိုင်ရာ ပစ္စည်းကရိယာများ၊ အသက်ကယ်လှေနှင့် ဆက်စပ်ပစ္စည်းများ၊ ဆံပင်တု ၊ ပီနံအိတ်၊ ဖဲပြားစသည်ဖြင့် လုပ်ငန်းပေါင်းစုံစက်ရုံများ ထူထောင်ဆောင်ရွက် လျှက်ရှိပါသည်။ လက်ခစား (CMP)လုပ်ငန်းများ တိုးတက်လာမှုကြောင့် မြန်မာပြည်သူပြည်သားများ အလုပ်အကိုင်အခွင့်အလမ်းများ တိုးတက် ရရှိလာမှုမှာ အထင်အရှားဖြစ်ပါသည်။ မြန်မာနိုင်ငံအနေဖြင့် လုပ်သား အင်အားပေါများဈေးချိုခြင်း၊ စက်ရုံ အလုပ်ရုံ တည်ဆောက်ထူထောင်ရန် မြေနေရာများ ပေါများခြင်းတို့ကြောင့် ပြည်ပလုပ်ငန်းရှင်များ မျက်စေ့ကျနေသော်လည်း အင်အားကြီးနိုင်ငံကြီးအချို့၏ စီးပွားရေးပိတ်ဆို့မှု များကြောင့် တိုးတက်မှုအနေဖြင့် အနည်းငယ်နောက်ကျနေခဲ့ရပါသည်။ လက်ခစားလုပ်ငန်းများအနက် အထည်ချုပ်လုပ်ငန်းမှာ 2011-2012 ဘဏ္ဍာနှစ်တွင် အမေရိကန် ဒေါ်လာ ၄၉၈ သန်းကျော်ဖြင့် အများဆုံးတိုးတက်တင်ပို့နိုင်ခဲ့ပြီး အအောင်မြင်ဆုံးဖြစ်ကြောင်း တစ်နှစ်ထက် တစ်နှစ် တိုးတက် လာကြောင်း သိရှိရပါသည်။ စီးပွားရေးပိတ်ဆို့မှုများ ကြောင့် ဂျပန်နှင့် တောင်ကိုရီးယားနိုင်ငံ တို့သို့ အများဆုံး တင်ပို့နေ ခဲ့ရခြင်းဖြစ်ပါသည်။ နိုင်ငံကြီးအချို့၏ စီးပွားရေးပိတ်ဆို့မှုများ ဖြေလျှော့ လာပြီဖြစ်၍ လက်ခစား(CMP) လုပ်ငန်းများတွင် ရင်းနှီးမြှုပ်နှံလုပ်ကိုင်မှုများ တိုးတက်လာတော့မည်ဖြစ်ရာ အရည်အသွေး စစ်ဆေးမှုအပိုင်းတွင် စနစ်ကျန တင်းကြပ် လွန်းသော ဂျပန်နိုင်ငံ သို့ပင် အောင်မြင်စွာ ချုပ်လုပ်တင်ပို့ နိုင်စွမ်းရှိပြီးဖြစ်သော မြန်မာနိုင်ငံအနေဖြင့် အသစ်ဝင် ရောက်ဖြစ်ထွန်းလာမည့် ရင်းနှီးမြှုပ်နှံမှုလုပ်ငန်းများမှ အခွင့်အလမ်းကောင်းများ ရရှိလာတော့မည်ဖြစ်ကြောင်း သတင်း ကောင်းပါးရေး သားတင်ပြအပ်ပါသည်။

                                                                                                             ထားထားရီ (ပို့ကုန်)

         မြန်မာ့စိုက်ပျိုးရေးထွက်ကုန်များအား ပြည်ပသို့ တင်ပို့လျှက်ရှိရာ ဥယျာဉ်ခြံထွက် ပန်းမာလ်များ ကိုလည်း တင်ပို့ခွင့်ပြုပေးထားပါသည်။ ယခင်က ဂန္ဓမာပန်းများကို စင်္ကာပူနိုင်ငံသို့ တင်ပို့ရောင်းချခဲ့ဘူးပြီးဖြစ် ပါသည်။ မြန်မာ့စိုက်ပျိုးရေးထွက်ကုန် သီးနှံ ပန်းမာလ်များကို ဈေးကွက်ရှာဖွေ ၍ တင်ပို့ရောင်းချခဲ့ရာ လေကြောင်းမှ စိန်တစ်လုံး သရက်သီးနှင့် ဂန္ဓမာပန်းများ တင်ပို့နိုင်ခဲ့ပြီး ယခုအခါ စံပါယ်ပန်းနှင့် သစ္စာပန်းများ ကို ပထမဦးဆုံး ဈေးကွက်စမ်းသပ်တင်ပို့သွားမည် ဖြစ်ကြောင်း သိရှိရပါသည်။

          စံပါယ်ပန်းနှင့် သစ္စာပန်းများကို မြန်မာနိုင်ငံ ဒေသအနှံ့တွင် စိုက်ပျိုးထွက်ရှိနိုင်သော်လည်း သစ္စာပန်းအနေဖြင့် ပြင်ဦးလွင်မြို့၊ အောင်ပန်းမြို့၊ ကလောမြို့ စသော ရာသီဥတု အေးမြကောင်းမွန်သည့် ရှမ်းပြည်နယ်ဒေသများမှ စိုက်ပျိုးထွက်ရှိသော ပန်းများမှာ အရည်အသွေးအမြင့်ဆုံး၊ အလှဆုံး၊အကောင်းဆုံး စံချိန်မီပန်းများဖြစ်ပြီး ရောင်းပန်းလှသော ပန်းများ ဖြစ်ကြောင်းသိရှိရပါသည်။ ပန်းများကို ဘုရားပုထိုးများ ကိုးကွယ်မှုဆိုင်ရာ ဘာသာရေးရုပ်တုများတွင် လှူဒါန်းပူဇော်ခြင်း၊ အမျိုးသမီးများဦးခေါင်းတွင် အမြတ်တနိုး ပန်ဆင်ခြင်း၊ အခမ်းအနားများတွင် အလှပန်းထိုးခြင်း စသည်ဖြင့် ပုံစံအမျိုးမျိုးဖြင့် အသုံးပြုလျှက်ရှိပါသည်။ ဖြူဖွေးမွှေးပျံ့သော စံပါယ်ပန်းများနှင့် အရောင်အသွေးစုံလှပသော သစ္စာပန်းများကို ယခင်က သရက်သီးနှင့် ဂန္ဓမာပန်းများ စတင်ဈေးကွက်ရှာဖွေ တင်ပို့ခဲ့သော ကုမ္ပဏီမှပင် ပြည်ပသို့တင်ပို့မည်ဖြစ်ကြောင်း သိရှိရပါသည်။ ပန်းများတင်ပို့ရန်အတွက် ကုန်သွယ်ရေးညွှန်ကြားမှုဦးစီးဌာန၊ ရန်ကုန်တိုင်းဒေသကြီးရုံးခွဲတွင် ပို့ကုန်လိုင်စင် လျှောက်ထား ခွင့်ပြုထုတ်ပေးထားပြီးဖြစ် ကြောင်း သိရှိရပါသည်။ ယခင်က ဘုရားတွင် ပူဇော်လှူဒါန်းရန်နှင့် အလှပန်းထိုးရန် ပြည်တွင်းတွင် တစ်ပိုင်တစ်နိုင်ရောင်းချနေရာမှ ပြည်ပသို့တင်ပို့ ရောင်းချခြင်းဖြင့် နိုင်ငံခြား ဝင်ငွေ ရရှိလာတော့မည့် ပို့ကုန်အမယ်သစ် တစ်မျိုးဖြစ်လာတော့မည် ဖြစ်ပါသည်။

              ကျန်ရှိနေသေးသော မြန်မာ့စိုက်ပျိုးရေးထွက်ကုန်များမှပြည်ပသို့ တင်ပို့ရောင်းချနိုင်မည့် အမယ်သစ်များအား ရှာဖွေဖော်ထုတ်၍ ဈေးကွက်ရရှိ တင်ပို့နိုင်ရန် ပို့ကုန်လုပ်ငန်းဆောင်ရွက်နေသည့် ကုမ္ပဏီများအနေဖြင့် ဝိုင်းဝန်း ကြိုးပမ်း ဆောင်ရွက်သွားနိုင်စေရေးအတွက် သတင်းကောင်းပါး ရေးသား တင်ပြအပ်ပါသည်။

                                                                                                                                                           သက်နိုင်ဦး (ပို့ကုန်)

မြန်မာနိုင်ငံအနေဖြင့် စိုက်ပျိုးရေးကို အခြေခံသော နိုင်ငံတစ်ခုဖြစ်သည်နှင့်အညီ စိုက်ပျိုးရေး ထွက်ကုန်များကို ပြည်ပသို့တင်ပို့ ရောင်းချလျှက်ရှိရာ ယခင်က ကုန်ကြမ်း Raw အဖြစ်သာ တင်ပို့ခဲ့ရာမှ နောက်ပိုင်းတွင် တန်ဘိုးမြင့်ထုတ်ကုန် Value Added အဖြစ်ထုတ်လုပ်တင်ပို့လာကြပါသည်။ ကုန်ကြမ်း အတိုင်း တင်ပို့ခြင်းထက် ဈေးနှုန်းအားဖြင့် ပိုမိုရရှိသဖြင့် အကျိုးအမြတ်ပိုမိုရရှိခြင်း၊ ပြည်တွင်း အလုပ်အကိုင် အခွင့်အလမ်းများ တိုးတက် လာခြင်းစသော အကျိုးကျေးဇူးများကြောင့် ပြည်တွင်းထွက်ကုန်များကို Value Added အဖြစ်ကြိုးပမ်းထုတ်လုပ် တင်ပို့လျှက်ရှိရာ လယ်ယာကိုင်းကျွန်းထွက်ကုန်တစ်မျိုးဖြစ်သော ဂျင်း (Ginger)ကိုလည်း ယခင်က ဂျင်းအစို၊ ဂျင်း အခြောက်နှင့် ဂျင်းခြောက်အပိုင်းများအဖြစ်သာ တင်ပို့နေခဲ့ရာမှ ဂျင်းခြောက်အမှုန့်အဖြစ် ကုမ္ပဏီတစ်ခုက ထုတ်လုပ် တင်ပို့တော့မည် ဖြစ်ကြောင်းသိရှိရပါသည်။ ဂျင်းကို အခြောက်အတိုင်း တင်ပို့ပါက တစ်တန် လျှင် ဒေါ်လာ ၁၄၄၀ မှ ၁၄၆၀ အတွင်းသာရရှိသော်လည်း အမှုန့်ပြု လုပ်တင်ပို့ခြင်းဖြင့် တစ်တန်လျှင် ဒေါ်လာ ၁၇၀၀ ဈေးနှုန်း ရရှိသောကြောင့် ဈေးနှုန်းအားဖြင့် ပိုမိုရရှိကြောင်း သိရှိရပါသည်။ ဂျင်းမှုန့်အား အစား အသောက် နှင့် တိုင်းရင်းဆေးဝါး ဖော်စပ်ရာတွင် ထည့်သွင်းအသုံးပြုမည် ဖြစ်ပြီး စင်္ကာပူနိုင်ငံမှ တစ်ဆင့် ဆိုက်ပရပ်စ်င်ငံသို့ ဆက်လက် တင်ပို့သွားမည် ဖြစ်ကြောင်း စုံစမ်းသိရှိရ ပါသည်။ ဂျင်းမှုန့်အား အချို့နိုင်ငံများတွင် အညောင်းပြေစေ ရန်နှင့် ဂျင်း၏ သင်းပျံ့သော ရနံ့ရရှိစေရန် ဂျင်းမှုန့် အထုပ်ငယ်များအား ရေချိုးကန်များအတွင်းစိမ်၍ ရေချိုးရာတွင် အသုံးပြုကြောင်းသိရှိရပါသည်။ ဂျင်းကို ယခင်က ပါကစ္စတန် နှင့် စင်္ကာပူ နိုင်ငံတို့သို့ အများဆုံး တင်ပို့လျှက် ရှိကြောင်း သိရှိရပါသည်။ ဂျင်းမှုန့် တင်ပို့ရန်အတွက် ကုန်သွယ်ရေးညညွှန်ကြားမှုဦးစီးဌာနသို့ ပို့ကုန်လိုင်စင်လျှောက်ထားခဲ့ရာ ခွင့်ပြုပေးခဲ့ပြီး ပြည်ပသို့ တင်ပို့ရန် အဆင်သင့် ရှိနေပြီဖြစ်ကြောင်း သိရှိရပါသည်။ မြန်မာ့ဂျင်းအား ဂျင်းမှုန့်အဖြစ် Value Added ထုတ်လုပ်တင်ပို့တော့မည် ဖြစ်ကြောင်း သတင်းကောင်းပါးရေးသား တင်ပြအပ်ပါသည်။                                                                          

                                                                                                                                                 သက်နိုင်ဦး(ပို့ကုန်)

       လယ်ယာစိုက်ပျိုးရေးကို ဖွံ့ဖြိုးတိုးတက်အောင်ဆောင်ရွက်လျှက်ရှိသည့် မြန်မာနိုင်ငံသည် ပြည်တွင်းစားသုံးမှုပိုလျှံသည့် မြန်မာ့လယ်ယာထွက်ကုန်ပစ္စည်းများကို ပြည်ပသို့တင်ပို့ရင်း အဆိုပါပစ္စည်းများမှ ထွက်ရှိလာ သည့်ဘေးထွက်ပစ္စည်းများကိုလည်း ပြည်ပပို့ကုန်ဝင်ငွေရရှိရေးအတွက် ပြည်ပနိုင်ငံများသို့ တင်ပို့လျှက်ရှိ ပါတယ်။

       ဆန်စပါးမှထွက်ရှိသော ဘေးထွက်ပစ္စည်းဖြစ်သည့် စပါးခွံဖွဲပြာအား ယခုအခါ ဂျပန်နိုင်ငံမှ ဝယ်ယူရန် ကမ်းလှမ်းလာပါသဖြင့် မြန်မာနိုင်ငံရှိကုမ္ပဏီတစ်ခုသည် အဆိုပါစပါးခွံဖွဲပြာအား တင်ပို့ရန်အတွက် ကုန်သွယ်ရေး ညွှန်ကြားမှုဦးစီးဌာနတွင် ပို့ကုန်လိုင်စင်လျှောက်ထားနိုင်ရေး ဆောင်ရွက်လျှက်ရှိကြောင်း သိရှိရ ပါတယ်။

       မိမိတို့နိုင်ငံတွင် စပါးခွံဖွဲပြာအား အိုးခွက်များဆေးကြောတိုက်ချွတ်ရာတွင် အိုးတိုက်ဖွဲပြာအဖြစ်အသုံး ပြုခြင်း၊ စိုက်ပျိုးရေးလုပ်ငန်းအတွက် ပျိုးပင်များစိုက်ပျိုးရာတွင် မြေဆွေး၊ သဲတို့နှင့်ရောစပ်၍ သုံးစွဲခြင်းများရှိပြီး၊ ဂျပန် နိုင်ငံတွင်မူ သံရိုင်းနှင့် သံကုန်ကြမ်းများကို အရည်ဖျော်စက်အတွင်းသို့ထည့်ရာ၌ သံချော်ရည်များကို စစ်ထုတ်ရန်အတွက် စပါးခွံဖွဲပြာအား ထည့်သွင်းအသုံးပြုမည်ဖြစ်ကြောင်းသိရှိရပါတယ်။

       သို့ပါ၍ ဘေးထွက်စွန့်ပစ်ပစ္စည်းတစ်မျိုးဖြစ်သည့် စပါးခွံဖွဲပြာသည် အမှိုက်ထဲမှ ရွှေဖြစ်လာနိုင်ကာ ပြည်ပပို့ကုန်ဝင်ငွေရရှိနိုင်ရေး ဆောင်ရွက်ပေးနိုင်တော့မည်အကြောင်း သိရှိနိုင်ပါရန် သတင်းကောင်းပါး ရေးသား တင်ပြ အပ်ပါသည်။

                                                                                                                                                                                                                          စန္ဒာထွန်း (ပို့ကုန်)