နောက်ဆုံးရ သတင်း
ဧရာဝတီတိုင်းဒေသကြီး ဟင်္သာတခရိုင် ဟင်္သာတမြို့နယ်ကုန်းကြီး ကျေးရွာ အုပ်စု နတ်မော်လမ်း ဆန်စက်အမှတ် ၁၆၅ ယုန်မင်း ဆန်စက်ကွင်းမှာလည်းကောင်း၊ ဇလွန်မြို့နယ် ဗိုလ်ချုပ်လမ်း ညောင်ပင်ဈေးရပ်ကွက် ဦးစိုးလွင်ရဲ့ ခြံဝင်းအတွင်းမှာ လည်းကောင်း၊ နိုင်ငံတော် အရန်ဆန်အား အဝယ်ဒိုင်ဖွင့်လှစ်ပြီး စိုက်ပျိုး ထုတ်လုပ်သူ တောင်သူများထံမှ စပါးများကိုတင်း၁၀၀ကို ၃ သိန်း ၃ သောင်းကျပ်ဈေးနဲ့ ဝယ် ယူလျက်ရှိပြီး၊ ဖေဖော်ဝါရီ ၇ ရက် ဟင်္သာတမြို့နယ်မှာ ၁၀၆၄ တင်းနဲ့ ဇလွန်မြို့နယ် မှာ ၂၀၀၀ တင်း ဝယ်ယူရရှိခဲ့ကြောင်း သိရပါတယ်။
ကျော်ဝင်း
ကုမ္ပဏီများသည် သွင်းကုန်လိုင်စင်လျှောက်ထားခြင်းနှင့် ထုတ်ယူခြင်းတို့ကို ဆောင်ရွက်ရာတွင် ကုမ္ပဏီအုပ်ချုပ်မှု ဒါရိုက်တာ သို့မဟုတ် ဒါရိုက်တာ ကိုယ်တိုင်ထုတ်ယူခြင်း မဟုတ်ပါက ဝန်ကြီးဌာန၏ ကုန်သွယ်မှုမူဝါဒ ဥပဒေလုပ်ထုံး လုပ်နည်းများဆိုင်ရာ စိစစ်ဆောင်ရွက်ရေးဌာနခွဲမှ ထုတ် ပေးထားသော လုပ်ငန်းရှင်ကိုယ်စားလှယ် မှတ်ပုံတင်ကတ် ကို ကိုင်ဆောင်သူ ကိုယ်တိုင်ဆောင်ရွက်ရန် အသိပေးနှိုး ဆော်ထားပါသည်။
သို့ပါ၍ လုပ်ငန်းများဆောင်ရွက်ရာတွင် ၂၀၁၂ ခုနှစ် ဖေဖော်ဝါရီ ၁ ရက်မှစ၍ အသိပေးနှိုးဆော်ချက် အတိုင်း တိကျစွာလိုက်နာဆောင်ရွက်ကြရန်နှင့် လုပ်ငန်းရှင် ကိုယ်စား လှယ် မှတ်ပုံတင်ကတ်ပြုလုပ်ရခြင်း မရှိသေးပါက ကုန်သွယ်မှု မူဝါဒဥပဒေ လုပ်ထုံးလုပ်နည်းများဆိုင်ရာစိစစ်ဆောင်ရွက်ရေး ဌာနခွဲတွင် အချိန်မီ ပြုလုပ်ဆောင်ရွက်သွားကြရန် အသိပေး ကြေညာချက်ထုတ်ပြန်ထားကြောင်း သတင်းရရှိသည်။
နေပြည်တော် ဖေဖော်ဝါရီလ ၃ ရက်နေ့
မော်တော်ယာဉ်တင်သွင်းခွင့်ဆိုင်ရာကြီးကြပ်ရေးကော်မတီသို့ ပို့ဆောင်ရေးဝန်ကြီးဌာနမှ သင်္ဘောသားများအတွက် ပြည်ပမှမော်တော်ယာဉ်တင်သွင်းရန် အမည်စာရင်း ပေးပို့လာမှုသည် ၇-၁၂-၂၀၁၁ ရက်နေ့ မှ ၃-၂-၂၀၁၂ ရက်နေ့ အတွင်း စုစုပေါင်း (၁၈၈၇) ဦးရှိသွားပြီဖြစ်ကြောင်း နှင့် ၂-၂-၂၀၁၂ ရက်နေ့အထိ ပါမစ်အမှန်တကယ်လာရောက်လျှောက်ထားသူ (၃၀၉) ဦးကို ပါမစ်ထုတ်ပေးပြီးကြောင်း သတင်းရရှိ ပါသည်။
ထို့ပြင် ပြည်ပနိုင်ငံရှိမြန်မာသံရုံးများတွင် တာဝန်ထမ်းဆောင်နေကြသော ဝန်ထမ်းများက မော်တော်ယာဉ်လာရောက်လျှောက်ထားမှုကို ၂-၂-၂၀၁၂ ရက်နေ့မှ စတင်ဆောင်ရွက်ပေးလျှက် ရှိရာ ၃-၂-၂၀၁၂ ရက်နေ့ နေ့ခင်း ၁၅း၀၀ နာရီအချိန်တွင်း စုစုပေါင်းပါမစ် (၁၂) စောင်ကိုထုတ်ပေးပြီး သွားပြီဖြစ် ကြောင်းသိရှိရပါသည်။
အေးမွန်မွန်လှိုင်
မြန်မာနိုင်ငံ ဆန်စပါးလုပ်ငန်းအသင်း၊ ဗဟို သမဝါယမအသင်းနဲ့ နိုင်ငံတော်တို့ ပူးပေါင်းပြီး နိုင်ငံတော်အရန်ဆန်ဝယ်ယူရေး ဆောင်ရွက်လျက် ရှိရာမှာ ပထမအဆင့်အနေနဲ့ စပါးတင်း ၁၀၀ ကို ကျပ် ၃၃၀၀၀၀ နဲ့ဝယ်ယူဖို့အတွက် နိုင်ငံတော် အစိုးရမှ ဇန်နဝါရီ ၂၇ ရက်က ငွေကျပ် ၁၀ ဘီလီယံ ခွင့်ပြုချထား ပြီဖြစ်ကြောင်း သိရပါတယ်။ မြန်မာနိုင်ငံ ဆန်စပါးလုပ်ငန်းအသင်းအနေနဲ့ လည်း အရန်ဆန်ဝယ်ယူရေးမှာ အချိုးကျထည့်ဝင် ရေးအတွက် ဆန်တင်ပို့သူများ၊ လုပ်ငန်းရှင်များ စုစည်းကာ အများပိုင်ကုမ္ပဏီတစ်ခု ဖွဲ့စည်းဖို့ အတွက် ပြင်ဆင်လျက်ရှိပါတယ်။ ဇန်နဝါရီ ၂၈ ရက်အထိ အများပိုင်ကုမ္ပဏီ Founder ၅၃ ဦးမှ အဆိုပြု မတည်ရင်းနှီးငွေ ကျပ် ၇ ဒသမ ၆ ဘီလီယံရရှိထားပြီးဖြစ်တယ်လို့ အသင်းတွဲဖက်အတွင်းရေးမှူးမှ ပြောကြားပါတယ်။ အဲဒီအဆိုပြု မတည်ရင်းနှီးငွေရဲ့ ၄၀ ရာခိုင် နှုန်းဖြစ်တဲ့ ၃ ဒသမ ၀၄ ဘီလီယံကိုတော့ စုစည်းရရှိထားပြီးဖြစ်ကြောင်းနဲ့ အရန်ဆန်ဝယ်ယူရရှိမှု အခြေအနေပေါ်မူတည်လို့ ကျန်ရင်းနှီးငွေ ၆၀ ရာခိုင်နှုန်းထဲက လိုအပ်တဲ့ပမာဏကိုလည်း စုစည်း သွားမယ်လို့ ဆိုပါတယ်။ နိုင်ငံတော်မှလည်း ခွင့်ပြု ငွေရရှိပြီဖြစ်လို့ အရန်ဆန်ဝယ်ယူမှု လက်တွေ့ အကောင်အထည်ဖော်တာကို ဇန်နဝါရီလကုန် ပတ်မှာ စတင်တော့မယ်လို့လည်းသိရပါတယ်။
လမင်း
အင်ဒိုနီးရှားနိုင်ငံ သီးနှံဝယ်ယူရေးအေဂျင်စီဖြစ်တဲ့ ဘူးလော့ဂ်အဖွဲ့ဟာ မြန်မာနိုင်ငံကို ရောက်ရှိလျက်ရှိပြီး ဆန်တန်ချိန် နှစ်သိန်းဝယ်ယူရေး အတွက် မြန်မာနိုင်ငံ ဆန်စပါးလုပ်ငန်းအသင်းနဲ့ ဇန်နဝါရီ ၂၈ ရက် ညနေ ၆နာရီခွဲက ပါ့ခ်ရွိုင်ရယ်ဟိုတယ်မှာ နားလည်မှုစာချွန်လွှာ (MOU) ရေးထိုးခဲ့ကြောင်း သိရပါတယ်။ MOU ကို ဘူးလော့ဂ်ဥက္ကဋ္ဌ Mr.Alimoeso နဲ့ မြန်မာနိုင်ငံ ဆန်စပါးလုပ်ငန်းအသင်း ဥက္ကဋ္ဌ ဦးချစ်ခိုင်တို့က လက်မှတ်ရေးထိုးခဲ့တယ်လို သိရပါတယ်။ အဆိုပါအခမ်းအနားကို စီးပွားရေးနဲ့ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး ဒေါက်တာပွင့်ဆန်းနဲ့ ပြည်ထောင်စု သမ္မတ မြန်မာနိုင်ငံ ဆိုင်ရာ အင်ဒိုနီးရှားနိုင်ငံ သံအမတ်ကြီး H.E. Sumarsono တို့ တက်ရောက်ပြီး အမှာစကားပြောကြားခဲ့ပါတယ်။ ဘူးလော့ဂ်အဖွဲ့ဟာ ဇန်နဝါရီ ၂၇ ရက်မှာလည်း နေပြည်တော်ရှိ စီးပွားရေးနဲ့ ကူးသန်းရောင်းဝယ်ရေးဝန်ကြီးဌာန ပြည်ထောင်စု ဝန်ကြီး ဦးဝင်းမြင့်နဲ့လည်းတွေ့ဆုံပြီး မြန်မာနိုင်ငံမှ ဆန်၊ ကြံနဲ့ ပဲပုပ်တို့ကိုလည်း ဝယ်ယူလိုကြောင်းဆွေးနွေးခဲ့တယ်လို့ သိရပါတယ်။ ဒါ့အပြင် လယ်ယာစိုက်ပျိုးရေးနဲ့ ဆည်မြောင်း ဝန်ကြီးဌာန ပြည်ထောင်စုဝန်ကြီး ဦမြင့်လှိုင်နဲ့လည်းတွေ့ဆုံပြီး ဆန်စပါးကဏ္ဍ၊ ကြံကဏ္ဍနဲ့ ပဲမျိုးစုံကဏ္ဍတို့မှာ ရင်းနှီးမြှုပ်နှံ လိုကြောင်း ဆွေးနွေးခဲ့တယ်လို့ သိရပါတယ်။
''မြန်မာနိုင်ငံက ဆန်တန်ချိန်နှစ်သိန်းကို ၂၀၁၂ခုနှစ်အတွင်းမှာ ဝယ်ယူဖို့ရှိပါတယ်။ ဝယ်ယူမယ့်ဆန် အမျိုးအစားတွေက ဆန်ဖြူ ၅မှတ်၊ ၁၀မှတ်၊ ၁၅မှတ်နဲ့ ၂၅မှတ် ဆန်တွေပါ၊ လာမယ့်ဖေဖော်ဝါရီလအတွင်းမှာ ပထမနဲ့ ဒုတိယ Shipment ကိုစပြီး တင်ပို့ဖို့သဘောတူထားပါတယ်'' လို့ မြန်မာနိုင်ငံဆန်စပါးလုပ်ငန်း အသင်းရဲ့ တွဲဖက်အထွေထွေအတွင်းရေးမှူး ဦးမျိုးသူရအေးက ပြောပါတယ်။ အင်ဒိုနီးရှားနိုင်ငံဟာ နှစ်စဉ် လူဦးရေတိုးပွား လာနေတာနဲ့အမျှ ပြည်တွင်း ထုတ်လုပ်မှုနဲ့ မလုံ လောက်တဲ့အတွက် နှစ်စဉ် ပြည်ပဆန်တင်သွင်း နေရလျက်ရှိရာ အမေရိကန် စိုက်ပျိုးရေးဌာန စာရင်းအရ ၂၀၁၀-၂၀၁၁ မှာ တန်ချိန် ၂ ဒသမ ၇၈ သန်းခန့် တင်သွင်းခဲ့ရတယ်လို့ ဆိုပါတယ်။ မြန်မာနိုင်ငံအနေနဲ့ တင်ပို့မှုကိုကြည့်ရင် ယခင် ၂၀၀၁-၂၀၀၂ နဲ့ ၂၀၀၂-၂၀၀၃ ဘဏ္ဍာနှစ်ဝန်း ကျင်က ဆန်တန်ချိန် တစ်သိန်းအထက် တင်ပို့ခဲ့ ရာမှ နောက်ပိုင်းနှစ်တွေမှာ တန်ချိန် ထောင်ဂဏန်း ကိုသာ လျော့ကျတင်ပို့နိုင်ခဲ့တယ်လို့ သိရပါတယ်။
''ကျွန်တော်တို့က ပြည်ပကနေ လစဉ် စား အုန်းဆီတန်ချိန် နှစ်သောင်းနဲ့ သုံးသောင်းကြား သွင်းနေရတယ်၊ အင်ဒိုနီးရှားက ကမ္ဘာမှာ စားအုန်း ဆီ အများဆုံး ထုတ်လုပ်တဲ့နိုင်ငံပဲ၊ လက်ရှိဈေးအရ စားအုန်းဆီတစ်တန်ကို ဆန်သုံးတန်နဲ့ညီတော့ အပြန်အလှန် ကုန်ပစ္စည်း ဖလှယ်တဲ့စနစ် (Barter System) နဲ့ ရောင်းနိုင်ရင် ပိုကောင်းမယ်လို့ထင် တယ်'' လို့ မြန်မာနိုင်ငံ ဆန်စပါးလုပ်ငန်းအသင်းဝင် ဧရာဝတီတိုင်းဒေသကြီးမှ ဆန်စက်ပိုင်ရှင်တစ်ဦးက ပြောပါတယ်။
လမင်း