ASEAN-US တရားရေးဌာန (Department of Justice-DOJ) က ဦးဆောင်၍ အာဆီယံအဖွဲ့ဝင်နိုင်ငံများအတွက် "Economic Analysis" အလုပ်ရုံဆွေးနွေးပွဲကို ၂၀၂၂ ခုနှစ်၊ ဩဂုတ်လ ၁၅ ရက်နေ့နှင့် ၁၆ ရက်နေ့ မြန်မာစံတော်ချိန် နံနက် (၀၇:၃၀) နာရီမှ (၁၀:၀၀) နာရီအထိ Virtual စနစ်ဖြင့် ကျင်းပပြုလုပ်ခဲ့ရာ မြန်မာနိုင်ငံယှဉ်ပြိုင်မှုကော်မရှင်အဖွဲ့ဝင်များနှင့် ကော်မရှင်ရုံးမှ အရာထမ်းများ တက်ရောက်ဆွေးနွေးခဲ့ကြပါသည်။
အလုပ်ရုံဆွေးနွေးပွဲ ကျင်းပပြုလုပ်ရခြင်း၏ ရည်ရွယ်ချက်မှာ လုပ်ငန်းများပေါင်းစည်းခြင်းဆိုင်ရာ အမှုကိစ္စများကို သုံးသပ်ခြင်း (Merger Review) နှင့် ဈေးကွက်လက်ဝါးကြီးအုပ်ခြင်းဆိုင်ရာ အမှုကိစ္စများ (Monopolization Cases) များနှင့်စပ်လျဉ်း၍ ဖြေရှင်းဆောင်ရွက်ရာတွင် စီးပွားရေးဆိုင်ရာ ခွဲခြမ်းစိတ်ဖြာမှုများကို နားလည်သဘောပေါက်မှု တိုးမြင့်လာစေရန် ရည်ရွယ်ခြင်းဖြစ်ပါသည်။
အလုပ်ရုံဆွေးနွေးပွဲကို အပိုင်း(၂)ပိုင်းခွဲ၍ ကျင်းပပြုလုပ်ခဲ့ရာ ပထမပိုင်းတွင် "လုပ်ငန်းများပေါင်းစည်းခြင်းဆိုင်ရာ အမှုကိစ္စများကို သုံးသပ်ခြင်းလုပ်ငန်းစဉ်များတွင် စီးပွားရေးပညာရှင်များ၏ အခန်းကဏ္ဍနှင့် သုံးသပ်ခြင်းပြုလုပ်သည့်အဖွဲ့ရှိ ဥပဒေပညာရှင်များနှင့် မည်သို့ပူးပေါင်းဆောင်ရွက်မည်" ဟူသည့် ခေါင်းစဉ်အပေါ် အဓိကထားဆွေးနွေးခဲ့ကြပြီး ဆွေးနွေးပွဲဒုတိယပိုင်းတွင် "စီးပွားရေးပညာရှင်များ၏ လုပ်ငန်းများပေါင်းစည်းခြင်းဆိုင်ရာ အမှုကိစ္စများကို ဖြေရှင်းဆောင်ရွက်ရာတွင် အသုံးပြုသည့်နည်းလမ်းများ" ကို အမှုနမူနာများနှင့်တကွ ရှင်းလင်းဆွေးနွေးခဲ့ကြပါသည်။
အလုပ်ရုံဆွေးနွေးပွဲတွင် US တရားရေးဌာနမှ စီးပွားရေးပညာရှင်များနှင့် ဥပဒေပညာရှင်များက ဦးဆောင်ဆွေးနွေးခဲ့ကြပြီး အာဆီယံအဖွဲ့ဝင်နိုင်ငံများမှ ကိုယ်စားလှယ်စုစုပေါင်း (၄၅)ဦး တက်ရောက်ဆွေးနွေးခဲ့ကြပါသည်။