မန္တလေးတိုင်းဒေသကြီး၊ မြင်းခြံမြို့နယ်၊ ကျီးပင်ကန်ကျေးရွာတွင် ကွမ်းကို တစ်နိုင်တစ်ပိုင် အနေဖြင့်သော်လည်းကောင်း၊ စီးပွားဖြစ်သော်လည်းကောင်း စိုက်ပျိုးကြပြီး မိုးစိုက်နှင့်ဆောင်းစိုက် ဟူ၍ စိုက်ပျိုးကြရာ မိုးစိုက်မှာ ပိုးကျလွယ်ပြီး ပျက်စီးဆုံးရှုံးမှုများသဖြင့် ဆောင်းစိုက်ကိုသာ ပိုမို စိုက်ပျိုးကြကြောင်း သိရသည်။
စိုက်ပျိုးရန် ကွမ်းမျိုးအတွက် ကွမ်းညွန့်တစ်ညွန့်လျှင် လက်ကားဈေးငွေကျပ် ၄၀၀ ကျပ်ခန့် ဖြင့် ဝယ်ယူကာ ၀.၂၅ ဧက အကျယ်ရှိ ကွမ်းခြံ၌ ကွမ်းအညွန့် ၅၀၀-၅၅၀ ခန့် စိုက်ပျိုးကြပြီး မျိုးအနေဖြင့် ကွမ်းနုဝါမျိုးကို အများဆုံး စိုက်ပျိုးကြကြောင်း၊ ကွမ်းကို စိုက်ပျိုးပြီး ၅-၆ လခန့်အကြာ တွင် စတင်ခူးဆွတ်နိုင်ပြီး နေရာဒေသ၊ မြေအနေအထားနှင့် ကွမ်းမျိုးကောင်း မျိုးသန့်အပေါ်မူတည် ၍ ၃ နှစ်မှ ၅ နှစ်အထိ ခူးဆွတ်ရရှိနိုင်ကြောင်း၊ စိုက်ပျိုးမှုအတွက် မျိုး၊ သွင်းအားစု၊ လုပ်သားခ အပါ အဝင် ၀.၂၅ ဧကလျှင် ငွေကျပ် ၂၅ သိန်းခန့် ကုန်ကျကြောင်း၊ အထွက်နှုန်းအနေဖြင့် ကွမ်းရွက်ကို ၁၀ ရက်ခြား တစ်ကြိမ် ခူးဆွတ်ရပြီး တစ်ကြိမ် ခူးဆွတ်လျှင် ၁၀-၁၅ ပိဿာခန့် ထွက်ရှိ၍ တစ်လလျှင် ပိဿာချိန် ၃၅-၄၀ ခန့် ထွက်ရှိရာ ကွမ်းပင်များ ဖြစ်ထွန်း အောင်မြင်မှုအပေါ် မူတည်၍ အထွက်နှုန်း ကွာခြားမှုရှိကြောင်း၊ ဈေးနှုန်းဈေးကွက် အနေဖြင့် စက်တင်ဘာလ နောက်ဆုံးပတ်တွင် လက်ကား ဈေး ကွမ်း တစ်ပိဿာလျှင် ငွေကျပ် ၅,၀၀၀-၇,၀၀၀ နှုန်းဖြင့် မြင်းခြံမြို့ပေါ်ရှိ ကွမ်းအဝယ်ဒိုင်များသို့ တင်ပို့ရောင်းချကြကြောင်း၊ အအေးဓာတ်ဝင်လျှင် ကွမ်းအထွက်နှုန်း နည်းသွားသည့်အတွက် ဆောင်း တွင်းကာလများတွင် ဈေးနှုန်းတက်နိုင်မည်ဖြစ်ကြောင်း ကွမ်းစိုက်တောင်သူများထံမှ သိရသည်။
DOCA (မန္တလေး)