သောကြာနေ့ ။ ၁၁ ဇန်နဝါရီလ ၂၀၁၃ 11:42AM
စားသုံးသူ အကာအကွယ် ပေးရေးနှင့် တရားမဝင် ကုန်သွယ်မှု ပပျောက်ရေး လှုပ်ရှား ရှာဖွေ တားဆီးရေး အဖွဲ့ Mobile Team ၏ လုပ်ငန်းများ အရှိန် အဟုန် မြှင့်တင် ဆောင်ရွက် သွားနိုင်ရေး ညှိနှိုင်း အစည်း အဝေးအား ၂ဝ၁၃ ခု၊ ဇန်နဝါရီလ ၂ ရက်နေ့ နေ့လည် ၁း၃ဝ အချိန်တွင် မူဆယ်- နမ့်ခမ်း ကုန်သည်ကြီးများ အစည်း အဝေး ခန်းမ၌ ပြုလုပ်ခဲ့ ပါသည်။
ယင်း အစည်း အဝေးတွင် မူဆယ် ၁ဝ၅ မိုင် နယ်စပ် ကုန်သွယ်ရေး ဦးစီး ဌာန ညွှန်ကြားရေးမှူး ဦးဦးဟန်မှ Mobile Team နှင့် ဆက်စပ်သည့် ဆောင်ရွက်ခဲ့ မှုများ၊ ဆောင်ရွက်ဆဲ၊ ဆောင်ရွက်ရန် အခြေ အနေများ ဆက်နွယ်သည့် ဥပဒေ ဆိုင်ရာ အချက် အလက်များကို ရှင်းလင်း ပြောဆို ဆွေးနွေး ခဲ့ပါသည်။
ဖိတ်ကြား ထားသော ဌာန ဆိုင်ရာများ၊ မြို့နယ် အတွင်းရှိ ကုန်သည်ကြီးများ၊ ကုမ္ပဏီများ၊ ကုန်သွယ်မှု ဆိုင်ရာ အကျိုးဆောင်များ၊ ကား အသင်း၊ ကုန်တင် ဂိတ်များနှင့် စိတ်ဝင်စား သူများမှ မိမိတို့ သိလိုသော မရှင်းလင်းသော အချက်များအား မေးမြန်း ရာတွင် ရင်းနှီးစွာ ရှင်းလင်း တင်ပြခဲ့ ပါသည်။
၎င်းညှိနှိုင်း အစည်း အဝေးတွင် ညွှန်ကြားရေးမှူးမှ ဒေသခံများ၏ အကျိုး စီးပွားအား မထိခိုက် စေရန် နိုင်ငံလည်း အကျိုးရှိ စေရန် အတွက် မှန်ကန်သော ကုန်သွယ်မှု လမ်းကြောင်းမှ လူတိုင်း ပါဝင်စေ လိုကြောင်း၊ Mobile Team ၏ ပညာပေး ကာလ ပြီးဆုံး သွားပြီ ဖြစ်၍ ဥပဒေ အရ အရေးယူ ဆောင်ရွက် ရမည် ဖြစ်သည့် အတွက် ညီနောင်များမှ အသိကို သတိနှင့် ယှဉ်တွဲ၍ လက်တွဲ လုပ်ဆောင် စေလိုကြောင်း၊ နိုင်ငံတော် ဖွံ့ဖြိုး တိုးတက်ရေး အတွက် ပြည်သူ့ ဘဏ္ဍာ ဖြည့်တင်း ရာတွင် လုပ်ငန်းရှင်များ အနေဖြင့် အခွန် အခအား အပြည့် အဝ ပေးဆောင်ပြီး ဖြူစင်သော ကုမ္ပဏီ သန့်ရှင်းသော စီးပွားရေး လုပ်ငန်းရှင်များ အဖြစ် ရပ်တည် စေလိုကြောင်း၊ Mobile Team သည် မည်သူ တစ်ဦး တစ်ယောက်ကိုမှ ဒုက္ခပေးရန် ရည်ရွယ်ချက် မရှိကြောင်း၊ လုပ်ငန်းရှင်များ အနေဖြင့်လည်း မိမိ၏ တစ်ဦး တစ်ယောက် ကောင်းစားရေး အတွက် နိုင်ငံနှင့် သူတစ်ပါး အကျိုးအား မထိခိုက် စေလိုကြောင်း၊ တရားမဝင် ကုန်သွယ်မှု ပြုနေသည့် အချို့သော လုပ်ငန်းရှင်ကြီးများ နှင့် ကူညီ အားပေးသူများ အနေဖြင့် ထိခိုက် ဆုံးရှုံးမှုများ နှင့် မကြုံတွေ့ စေရေး အတွက် တရားဝင် လမ်းကြောင်းမှ ကုန်သွယ်မှု ပြုကြရန် ယခုကဲ့သို့ အသိပေးခြင်း၊ သတိပေး ဆောင်ရွက်ခြင်းပြု ရကြောင်း စသည်ဖြင့် တင်ပြသွား ပါသည်။ အလားတူ ညှိနှိုင်း အစည်း အဝေးအား ၂၆-၁၂-၂ဝ၁၂ ရက်နေ့တွင် ဤ ကုန်သည်ကြီးများ အသင်း၌ ပြုလုပ်ခဲ့ သေးကြောင်း သိရ ပါသည်။
ထို့နောက် ၂၇-၁၂-၂ဝ၁၂ ရက်နေ့ အကောက်ခွန်မှ လွန်မြောက်ပြီး Mobile Team မှ ပြန်လည် ရှာဖွေ စစ်ဆေး ရာတွင် တွေ့ရှိ ခဲ့သည့် ၆ ဘီး ယာဉ်ကြီး ၂ စီး၏ အကောက်ခွန်မဲ့ ကုန် ပစ္စည်းများ စာရင်းအား ပရိုဂျက်တာဖြင့် ရှင်းလင်းပြီး အစည်း အဝေးအား ညနေ ၄းဝဝ ချိန်တွင် ရုတ်သိမ်း ခဲ့ပါသည်။
ဆရာမောင် (မူဆယ်)