ရုရှား၏ အဓိက ပို့ကုန်ဆိပ်ကမ်းတွင် ရေနံတင်သင်္ဘောများ ကုန်တင်နေပြီဖြစ်သောကြောင့် ရေနံဈေးနှုန်းကျဆင်းခဲ့
၂ ရက်ကြာ ယာယီရပ်ဆိုင်းခဲ့သော ပင်လယ်နက်ကမ်းရိုးတန်းရှိ ရုရှား၏ အဓိကရေနံတင်ဆိပ်ကမ်း Novorossiysk မှ ရေနံတင်သင်္ဘောများအား ထွက်ခွာခွင့်ပြုလိုက်ပြီဖြစ်သောကြောင့် နိုဝင်ဘာလ ၁၇ ရက်မှစ၍ အာရှဈေးကွက်တွင် ရေနံဈေးနှုန်းများ ကျဆင်းခဲ့ကြောင်း၊ နိုဝင်ဘာလ ၁၄ ရက်နေ့အပိတ် ဈေးထက် Brent စံနှုန်းအရ ရေနံစိမ်းတစ်စည်လျှင် ၀.၉ % ကျဆင်းခဲ့ကာ အမေရိကန်ဒေါ်လာ ၆၃.၈၁ နှင့် အမေရိကန်အနောက်တက္ကဆတ် WTI စံနှုန်းအရ ရေနံစိမ်းတစ်စည်လျှင် ၁.၀ % ကျဆင်းခဲ့ကာ အမေရိကန်ဒေါ်လာ ၅၉.၅၀ ဖြင့် အရောင်းအဝယ်ဖြစ်ခဲ့ကြောင်း The Economic Times သတင်းစာက ဖော်ပြထားပါသည်။
ရေနံဈေး ညွှန်းကိန်းနှစ်ခုစလုံးသည် Novorossiysk ဆိပ်ကမ်းနှင့် ယင်းကပ်လျက်ရှိ Caspian Pipeline Consortium ဆိပ်ကမ်းတို့မှ ရေနံတင်ပို့မှုများ ယာယီရပ်ဆိုင်းချိန်တွင် ကမ္ဘာ့ရေနံရောင်းလိုအား၏ ၂ % ထိခိုက်စေခဲ့သောကြောင့် ပြီးခဲ့သည့်သီတင်းပတ်အတွင်း ဈေးနှုန်း ၂ % ကျော် အတက်ဖြင့် ဈေးကွက်ပိတ်ခဲ့ပါသည်။
ဂျပန်စတော့ အိတ်ချိန်းကုမ္ပဏီတစ်ခုဖြစ်သော Fujitomi Securities မှ စီးပွားရေးဆိုင်ရာသုံးသပ်သူ Toshitaka Tazawa က “ရင်းနှီးမြှုပ်နှံသူများအနေဖြင့် ရေရှည်တွင် ရုရှား၏ ရေနံစိမ်းတင်ပို့မှုအပေါ် ယူကရိန်းတိုက်ခိုက်မှုများ၏ အကျိုးသက်ရောက်နိုင်မှုများကို တွက်ချက်နေသလို ပြီးခဲ့သည့် သီတင်းပတ်အတွင်း ဈေးတက်ခဲ့ခြင်းကြောင့် ရရှိသည့် အမြတ်အစွန်းများကို သိမ်းဆည်းထားကြောင်း၊ ယေဘုယျအားဖြင့် OPEC+ နိုင်ငံများက ရေနံထုတ်လုပ်မှု ဆက်လက်တိုးမြှင့်နေရာ ဈေးကွက်၌ ရေနံများ ပိုလျှံလာနိုင်သည်ဟု အမြင်များရှိကြောင်း၊ ထို့ကြောင့် WTI စံနှုန်းအရ ရေနံစိမ်းဈေး အတက်အကျသည် ၅ ဒေါ်လာအတွင်းသာ ရှိနိုင်ကြောင်း” ပြောကြားခဲ့ပါသည်။
ရင်းနှီးမြုပ်နှံသူများက ရေနံဈေးအတက်အကျကို ရုရှား၏ ရောင်းလိုအားနှင့် ကုန်သွယ်မှုအပေါ် အနောက်နိုင်ငံများ၏ ပိတ်ဆို့အရေးယူမှုများ၏ သက်ရောက်မှုကိုလည်း စောင့်ကြည့်လျက်ရှိပါသည်။ အမေရိကန်သမ္မတ ဒေါ်နယ်ထရမ့်က ရုရှားနှင့် စီးပွားရေးလုပ်ကိုင်သည့် မည်သည့်နိုင်ငံကိုမဆို ပိတ်ဆို့နိုင်သည့် ဥပဒေတစ်ရပ်ကို ပြင်ဆင်နေကြောင်းနှင့် အီရန်ကို ထိုစာရင်းတွင် ထည့်သွင်းနိုင်ကြောင်း ပြောကြားခဲ့ပါသည်။
ယခုလအစောပိုင်းတွင် OPEC+ နိုင်ငံများက ဒီဇင်ဘာလ၌ တစ်နေ့လျှင် ရေနံစိမ်းစည်ပေါင်း ၁၃၇၀၀၀ ထိ ထုတ်လုပ်သွားရန်နှင့် ၂၀၂၆ ခုနှစ်၊ ပထမသုံးလပတ်တွင်မူ ခေတ္တရပ်ဆိုင်းထားရန် သဘောတူညီခဲ့ကြပါသည်။