စီးပွားရေးနှင့် ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဦးထွန်းအုံ ဝန်ထမ်းများနှင့် တွေ့ဆုံကာ အမှာစကားပြောကြား
နေပြည်တော်၊ ဧပြီ ၂၁
စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးထွန်းအုံသည် ၂၀၂၆ ခုနှစ်၊ ဧပြီလ ၂၁ ရက်နေ့၊ နံနက် ၁၀:၀၀ နာရီအချိန်တွင် နေပြည်တော်၊ ရုံးအမှတ် (၃)၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ အစည်းအဝေးခန်းမ (၂) ၌ ကျင်းပပြုလုပ်သည့် ဝန်ထမ်းများနှင့် တွေ့ဆုံပွဲအခမ်းအနားသို့ တက်ရောက်အမှာစကား ပြောကြားခဲ့သည်။
ဦးစွာ ပြည်ထောင်စုဝန်ကြီးက နိုင်ငံတော်သမ္မတ၏ မိန့်ခွန်းအား အသေးစိတ်ထပ်ဆင့် ရှင်းလင်းပြီး နိုင်ငံ့ဝန်ထမ်းများအနေဖြင့် နိုင်ငံတော်သမ္မတ၏ မိန့်ခွန်းများတွင် ပါရှိသော လမ်းညွှန် မှာကြားမှုများကို လုပ်ငန်းလမ်းညွှန်အဖြစ်ခံယူ၍ အလေးအနက်ထား အကောင်အထည်ဖော် ဆောင်ရွက်ရမည်ဖြစ်ပါကြောင်း၊ ယခုကာလသည် မြန်မာ့နှစ်သစ်ကူး အချိန်အခါသမယဖြစ်သည့် အပြင် ဒီမိုကရေစီအစိုးရသစ်တစ်ရပ်လည်း ပေါ်ထွန်းလာပြီဖြစ်သကဲ့သို့ လွှတ်တော်များလည်း ပြန်လည်အသက်ဝင်လာကာ နိုင်ငံတော်ဖွံ့ဖြိုးတိုးတက်ရေးအတွက် တက်ညီလက်ညီ ကြိုးပမ်း ဆောင်ရွက်ရမည့် အချိန်ကာလဖြစ်ပါကြောင်း၊ နိုင်ငံ့ဝန်ထမ်းများဖြစ်သည့်အားလျော်စွာ စိတ်သစ်၊ လူသစ်၊ အင်အားသစ်များဖြင့် နိုင်ငံတော်နှင့် ပြည်သူ့အကျိုးအတွက် မိမိတို့၏လုပ်ငန်းတာဝန် များကို တက်တက်ကြွကြွ ကျေပွန်စွာထမ်းဆောင်ကြရန် တိုက်တွန်းလိုပါကြောင်း၊ နိုင်ငံ့ဝန်ထမ်း ဥပဒေနှင့် နည်းဥပဒေများတွင် ပြဋ္ဌာန်းထားသည့်အတိုင်း နိုင်ငံတော်အပေါ် သစ္စာစောင့်သိခြင်း သည် ဝန်ထမ်းတိုင်း၏ အခြေခံအကျဆုံး တာဝန်တစ်ရပ်ဖြစ်ကာ သန့်ရှင်းသော အစိုးရ၊ ကောင်းမွန် သော အုပ်ချုပ်မှုယန္တရား ဖြစ်ပေါ်လာစေရန်အတွက် အဂတိလိုက်စားမှုများ မဖြစ်ပေါ်စေရေး တာဝန်ရှိသူအဆင့်ဆင့်မှ စနစ်တကျထိန်းသိမ်းကြပ်မတ်သွားကြရန် ပြောကြားခဲ့သည်။
ဆက်လက်ပြီး ပြည်ထောင်စုဝန်ကြီးက ပြောကြားရာတွင်နိုင်ငံတော်ဖွံ့ဖြိုးတိုးတက်ရေး တည်ဆောက်ကြရာတွင် စီးပွားရေးဖွံ့ဖြိုးတိုးတက်မှုမှာ အခြေခံကျသည့်အုတ်မြစ်တစ်ခု ဖြစ်ပါ ကြောင်း၊ ယင်းသို့ နိုင်ငံ့စီးပွားရေးဖွံ့ဖြိုးတိုးတက်မှုအတွက် ဆောင်ရွက်ကြရာမှာ မိမိတို့ဝန်ကြီး ဌာနသည် ပြည်တွင်းကုန်ထုတ်လုပ်မှုကို ပူးပေါင်းဆောင်ရွက်ရန်နှင့် ပို့ကုန်ကဏ္ဍမြှင့်တင်ရမည် ဖြစ်ပါကြောင်း၊ ပို့ကုန်/သွင်းကုန် လုပ်ငန်းစဉ်များတွင် ကြန့်ကြာမှုမရှိစေဘဲ လွယ်ကူချောမွေ့စေ ရန်အလေးထားဆောင်ရွက်ရမည်ဖြစ်သကဲ့သို့ တစ်ဖက်တွင်လည်း ခေတ်မီနည်းပညာများကို အသုံးပြု၍ ဝန်ဆောင်မှုများကို ပိုမိုမြန်ဆန်အောင် ခေတ်နှင့်အညီ ပြုပြင်ပြောင်းလဲဆောင်ရွက် ကြရန်လိုအပ်ကြောင်း၊ ကုန်သွယ်မှုကဏ္ဍဖွံ့ဖြိုးတိုးတက်ရေးအတွက် ဆက်စပ်ဝန်ကြီးဌာနများ၊ အသင်းအဖွဲ့များနှင့် အမြဲမပြတ် ထိတွေ့ပြီး ဟန်ချက်ညီညီချိတ်ဆက်ပူးပေါင်းဆောင်ရွက်သွားရန် လိုအပ်ကြောင်းနှင့် ပြည်ပဈေးကွက်သို့ မြန်မာ့ထုတ်ကုန်များ ထိုးဖောက်ဝင်ရောက်နိုင်ရေးအတွက် ပြည်ပဈေးကွက်သစ်များ ရှာဖွေရမည်ဖြစ်ပါကြောင်း၊ စားသုံးသူများ၏ အခွင့်အရေးကာကွယ်ပေးရေး၊ မူပိုင်ခွင့်ဆိုင်ရာအကာအကွယ်ပေးရေးတို့ကို ဥပဒေ၊ နည်းဥပဒေ၊ လုပ်ထုံးလုပ်နည်းများနှင့် အညီ ဆောင်ရွက်ပေးရမည်ဖြစ်ပါကြောင်း ပြောကြားပါသည်။
၎င်းနောက် ဒုတိယဝန်ကြီးများဖြစ်ကြသော ဦးမင်းမင်းနှင့် ဦးဝင်းမြင့်ခိုင်တို့ကလည်း ဝန်ထမ်းများအား လိုအပ်သည်များ မှာကြားပါသည်။
ဝန်ထမ်းများနှင့် တွေ့ဆုံပွဲအခမ်းအနားသို့ စီးပွားရေးနှင့်ကူးသန်းရောင်းဝယ်ရေးဝန်ကြီး ဌာန၊ အမြဲတမ်းအတွင်းဝန်၊ ညွှန်ကြားရေးမှူးချုပ်များ၊ ဌာနဆိုင်ရာ အရာရှိကြီးများ၊ တိုင်းဒေသကြီး၊ ပြည်နယ်ဦးစီးမှူးများ၊ ဝန်ထမ်းများနှင့် ပြည်ပရှိ စီးပွားရေးသံမှူးများ စုစုပေါင်း (၅၇၂) ဦးတို့က In person/ Virtual တို့ဖြင့် တက်ရောက်ခဲ့ကြကြောင်း သတင်းရရှိပါသည်။