ကမ္ဘာ့ကုန်သွယ်ရေးအဖွဲ့ဝင် ဖွံ့ဖြိုးမှုအနည်းဆုံးနိုင်ငံများအတွက် ပို့ကုန်အကျိုးဖြစ်ထွန်းစေသည့် ကုန်စည်နှင့် ဝန်ဆောင်မှုတင်ပို့မှုများ ဈေးကွက်ဝင်ရောက်ခွင့်နှင့်စပ်လျဉ်းသည့် အစီရင်ခံစာကို ကမ္ဘာ့ကုန်သွယ်ရေးအဖွဲ့က ထုတ်ပြန်ခဲ့

၂၀၁၉ ခုနှစ်မှ ၂၀၂၄ ခုနှစ်အတွင်း ဖွံ့ဖြိုးမှုအနည်းဆုံးနိုင်ငံများ (LDCs) ၏ ကုန်စည်နှင့် ဝန်ဆောင်မှုတင်ပို့မှုသည် နှစ်စဉ်ပျမ်းမျှအားဖြင့် ၆.၇ % နှုန်းဖြင့် တိုးတက်ခဲ့ပြီး ၂၀၂၄ ခုနှစ်တွင် LDC နိုင်ငံများ၏ ကုန်ပစ္စည်းတင်ပို့မှုသည် ယခင်နှစ်ထက် ၅ %  တိုးလာခဲ့ကြောင်းနှင့် ကူးသန်း ရောင်းဝယ်ရေး ဝန်ဆောင်မှုတင်ပို့မှုသည် ၁၂.၆ % တိုးတက်မှုရှိခဲ့ကြောင်း အစီရင်ခံစာတွင် ဖော်ပြထားပါသည်။

၂၀၂၃ ခုနှစ်တွင် ကမ္ဘာ့ကုန်စည်နှင့် ကူးသန်းရောင်းဝယ်ရေးဝန်ဆောင်မှုများ တင်ပို့မှုတွင် LDC နိုင်ငံများ ပါဝင်မှုသည် ၁.၀၁ % ဖြစ်ပြီး ၂၀၂၄ ခုနှစ်တွင် ၁.၀၃ % ထိဖြစ်ကာ အနည်းငယ်မြင့်တက်လာခဲ့ ကြောင်း၊ သွင်းကုန်ဘက်တွင် LDC များ၏ ဝေစုသည် ၂၀၂၃ ခုနှစ်တွင် ၁.၃၇% ရှိရာမှ ၂၀၂၄ ခုနှစ် တွင် ၁.၄၁% အထိ ရောက်ရှိခဲ့ကာ အနည်းငယ်မြင့်တက်လာခဲ့ကြောင်း၊ သို့သော် LDC များ၏ အလုံးစုံ ကုန်သွယ်ရေးလိုငွေပြမှုသည် ဆက်လက်မြင့်တက်လျက်ရှိရာ ၂၀၂၄ ခုနှစ်တွင် အမေရိကန် ဒေါ်လာ ၁၀၉.၅ ဘီလီယံဖြစ်ပြီး ၂၀၂၃ ခုနှစ်ကထက် အမေရိကန်ဒေါ်လာ ၈ ဘီလီယံနီးပါး မြင့်တက် လာခဲ့ကြောင်း ဖော်ပြထားပါသည်။

၂၀၂၃ ခုနှစ်တွင် LDC နိုင်ငံများ၏ ကမ္ဘာ့ကုန်စည်တင်ပို့မှုတွင် ပါဝင်သောဝေစုမှာ ၁.၁၁% ရှိရာမှ ၂၀၂၄ ခုနှစ်တွင် ၁.၁၆ % အထိ ရှိကြောင်း၊ ကမ္ဘာလုံးဆိုင်ရာကုန်သွယ်ရေးဝန်ဆောင်မှုတင်ပို့မှုတွင် ပါဝင်သောဝေစုသည် ၂၀၂၃ ခုနှစ်တွင် ၀.၅၆ % ရှိပြီး ၂၀၂၄ ခုနှစ်တွင် ၀.၅၄ % သာရှိရာ အနည်းငယ် ကျဆင်းသွားခဲ့ကြောင်း၊ LDC နိုင်ငံများ၏ ကုန်ပစ္စည်းတင်ပို့မှုသည် ၂၀၁၉ ခုနှစ်တွင် အမေရိကန် ဒေါ်လာ ၁၉၇ ဘီလီယံမှ ၂၀၂၄ ခုနှစ်တွင် အမေရိကန်ဒေါ်လာ ၂၇၇ ဘီလီယံအထိ ရောက်ရှိခဲ့ပြီး နှစ်စဉ် ပျမ်းမျှအားဖြင့် ၇.၀% တိုးတက်ခဲ့ကြောင်း၊ ၂၀၂၄ ခုနှစ်တွင် ကုန်စည်တင်သွင်းမှုတန်ဖိုးသည် အမေရိကန်ဒေါ်လာ ၃၄၄ ဘီလီယံအထိ ရောက်ရှိခဲ့ကာ ၂၀၂၃ ခုနှစ်နှင့်နှိုင်းယှဉ်ပါက ၂.၈% တိုးလာ ခဲ့ကြောင်း ဖော်ပြထားပါသည်။

LDC နိုင်ငံများမှ ကုန်စည်တင်ပို့မှု စုစုပေါင်း၏ အဓိကထုတ်ကုန်ဝေစုတွင် ၂၀၁၉ ခုနှစ်မှ ၂၀၂၄ ခုနှစ်အတွင်း ၅၂ % နှင့် ၅၃ % အသီးသီး ပါဝင်ကာ တည်ငြိမ်လျက်ရှိကြောင်း၊ လောင်စာဆီဝေစုတွင်၂၀၁၉ ခုနှစ်၌ ၂၄ % ဖြစ်ပြီး ၂၀၂၄ ခုနှစ်၌ ၁၉% အထိ ကျဆင်းသွားခဲ့ကြောင်း၊ သံမဟုတ်သော သတ္တုများ၊ သတ္တုရိုင်းများနှင့် သတ္တုတွင်းထွက်များ၏ ဝေစုတွင် ၇% မှ ၁၃% အထိနှင့် ၅ % မှ ၉ % အထိ အသီးသီးမြင့်တက်ခဲ့ကြောင်း၊ အစီရင်ခံစာပြုစုနေစဉ်ကာလအတွင်း အစားအစာနှင့် စိုက်ပျိုးရေး ကုန်ကြမ်းများ၏ ဝေစုများတွင် ယေဘုယျအားဖြင့် တည်ငြိမ်လျက်ရှိပြီး LDC နိုင်ငံများမှ ပို့ကုန် များ၏ ထုတ်ကုန်ဖွဲ့စည်းပုံအနည်းငယ်သာ ပြောင်းလဲခဲ့ကြောင်း ဖော်ပြထားပါသည်။

၂၀၂၄ ခုနှစ်တွင် LDC နိုင်ငံများ တင်ပို့သည့် ထိပ်တန်း ၁၀ နိုင်ငံသည် LDC နိုင်ငံများ၏ ကုန်ပစ္စည်း တင်ပို့မှုအားလုံး၏ ၇၄ % ဖြစ်ရာ ၂၀၁၉ ခုနှစ်တွင် ၇၅ % ဖြစ်သဖြင့် သိသာထင်ရှားသော ပြောင်းလဲမှုမရှိသေးကြောင်း၊ ၂၀၂၄ ခုနှစ်တွင် LDC နိုင်ငံများအုပ်စု တွင် ဘင်္ဂလားဒေ့ရှ်နိုင်ငံသည် ထိပ်တန်းကုန်စည်တင်ပို့သည့်နိုင်ငံဖြစ်ပြီး LDC ပို့ကုန်အားလုံး၏ ၁၇ % ကို လွှမ်းခြုံထားကြောင်း၊ ၎င်း၏ နောက်တွင်  အင်ဂိုလာက ၁၄ %၊ ကွန်ဂိုဒီမိုကရက်တစ် သမ္မတနိုင်ငံက ၁၁ %၊ ကမ္ဘောဒီးယား က ၁၀ % နှင့် မြန်မာက ၅ % အသီးသီးဖြင့် ရပ်တည်လျက်ရှိကြောင်း၊ ၂၀၂၄ ခုနှစ်၌ LDC ကုန်ပစ္စည်း တင်ပို့မှုတွင် တရုတ်နိုင်ငံသည် ထိပ်တန်းဦးတည်ရာ ဈေးကွက် ၂၅ % ဖြစ်ပြီး၊ ၎င်း၏ နောက်တွင် ဥရောပသမဂ္ဂ ၁၇% ၊ အာရပ်စော်ဘွားများပြည်ထောင်စု ၁၂% ၊ အမေရိကန် ၉ % နှင့် အိန္ဒိယ ၇% တို့ အသီးသီးဖြစ်ခဲ့ကြောင်း၊ ၂၀၂၄ ခုနှစ်တွင် ထိပ်တန်းတင်သွင်း သည့်နိုင်ငံ ၁၀ နိုင်ငံက LDC စုစုပေါင်းပို့ကုန်များ၏ ၈၃% တင်သွင်းခဲ့မှုကြောင့် ၂၀၁၉ ခုနှစ်တွင် တင်သွင်းခဲ့သည့် ၈၂ % ပမာဏထက် အနည်းငယ်မြင့်တက်ခဲ့ကြောင်း ဖော်ပြထားပါသည်။

၂၀၂၄ ခုနှစ်တွင် LDC နိုင်ငံများ၏ စီးပွားဖြစ်ဝန်ဆောင်မှုတင်ပို့မှုသည် ကပ်ရောဂါမတိုင်မီက အဆင့် များကို ပထမဆုံးအကြိမ် ကျော်လွန်ခဲ့ကြောင်း၊ ၂၀၂၄ ခုနှစ်တွင် LDC ၏ ကူးသန်းရောင်းဝယ်ရေး ဝန်ဆောင်မှုတင်ပို့မှုသည် အမေရိကန်ဒေါ်လာ ၄၇.၃ ဘီလီယံအထိ မြင့်တက်ခဲ့ပြီး နှစ်စဉ်တိုးတက်မှု နှုန်းသည် ၁၃ % ရှိကြောင်း၊ ၂၀၂၄ ခုနှစ်တွင် LDC နိုင်ငံများ၏ ကမ္ဘာလုံးဆိုင်ရာကူးသန်းရောင်းဝယ် ရေးဝန်ဆောင်မှုတင်သွင်းမှုသည် ၁.၁၃ % ရှိကြောင်း၊ LDC နိုင်ငံများထံမှ ဝန်ဆောင်မှုတင်ပို့မှုများ သည် အလွန်အမင်း စုစည်းနေဆဲဖြစ်ပြီး ထိပ်တန်းဝန်ဆောင်မှုတင်ပို့သည့် ၁၀ နိုင်ငံက စုစုပေါင်း တင်ပို့မှု၏ ၇၃ % ကို တင်ပို့ခဲ့ကြောင်း၊ ၂၀၂၄ ခုနှစ်တွင် အီသီယိုးပီးယားသည် LDC နိုင်ငံများ၏ ကူးသန်း ရောင်းဝယ်ရေးဝန်ဆောင်မှုများကို ၁၇% ဖြင့် အများဆုံးတင်ပို့သည့် နိုင်ငံဖြစ်ပြီး၊ ၎င်း၏ နောက်တွင် တန်ဇန်းနီးယား ၁၅ % နှင့် ဘင်္ဂလားဒေ့ရှ် ၁၁ % အသီးသီးဖြစ်ကြောင်း ဖော်ပြထားပါသည်။

ဖွံ့ဖြိုးပြီးအဖွဲ့ဝင်အများစုနှင့် ဖွံ့ဖြိုးဆဲအဖွဲ့ဝင်အများအပြားသည် LDC နိုင်ငံများသို့ အခွန်ကင်းလွတ်ခွင့် အပြည့်အဝ သို့မဟုတ် အပြည့်အဝနီးပါး ဆက်လက်ပေးဆောင်လျက်ရှိကြောင်း၊ ဩစတြေးလျ၊ နယူးဇီလန်၊ နော်ဝေနှင့် ဆွစ်ဇာလန်နိုင်ငံတို့က LDC နိုင်ငံများအား ၁၀၀ % အခွန် ကင်းလွတ်ခွင့်ဖြင့် ဈေးကွက်ဝင်ရောက်ခွင့်ပေးထားကြောင်း၊ ချီလီ၊ ဥရောပသမဂ္ဂနှင့် ဗြိတိန်တို့က LDC နိုင်ငံများ အတွက် ၉၉ % ကျော် အခွန်ကင်းလွတ်ခွင့်ရှိသော ဈေးကွက်ဝင်ရောက်ခွင့်ကို ပေးထားကြောင်း၊ နောက်ဆုံးအစီရင်ခံစာထွက်ပြီးကတည်းက တရုတ်နိုင်ငံက ၂၀၂၄ ခုနှစ်၊ ဒီဇင်ဘာလ ၁ ရက်နေ့မှစ၍ သံတမန်ဆက်ဆံရေးရှိသော LDC နိုင်ငံအားလုံးအတွက် ၎င်းအခွန်လိုင်းများ၏ ၁၀၀% အထိ အကောက်ခွန်သုညပေးခဲ့ကြောင်း အစီရင်ခံစာက ဖော်ပြထားပါသည်။

ရင်းမြစ်။        https://www.wto.org