ကမ္ဘာ့ကုန်သွယ်ရေးအဖွဲ့ဆိုင်ရာ (၁၀) ကြိမ်မြောက် ဝန်ကြီးများအဆင့် ညီလာခံ ကျင်းပခြင်း

ကမ္ဘာ့ကုန်သွယ်ရေးအဖွဲ့၏ (၁၀) ကြိမ်မြောက် ဝန်ကြီးများအဆင့် ညီလာခံအစည်းအဝေးကို ကင်ညာ နိုင်ငံ၊ နိုင်ရိုဘီမြို့၌ ၂၀၁၅ ခုနှစ်၊ ဒီဇင်ဘာလ (၁၄) ရက်နေ့မှ (၁၈) ရက်နေ့အထိ ကျင်းပခဲ့ရာ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီး ဦးဝင်းမြင့်၊ ကုန်သွယ်ရေးဦးစီးဌာန၊ ညွှန်ကြားရေးမှူး ဦးကိုကိုလေး၊ ကုန်သွယ်ရေးဦးစီးဌာန၊ ဒုတိယညွှန်ကြားရေးမှူး၊ ဦးညီညီအောင်နှင့် ကမ္ဘာ့ကုန်သွယ်ရေးအဖွဲ့ ဆိုင်ရာမြန်မာအမြဲတမ်းကိုယ်စားလှယ်အဖွဲ့ရုံး၊ ဂျီနီဗာမြို့မှ Delegation Coordinator သံမှူး (WTO) ဦးအောင်မင်းသိုက် မြန်မာကိုယ်စားလှယ်အဖွဲ့ တက်ရောက်ခဲ့ပါသည်။

ကမ္ဘာ့ကုန်သွယ်ရေးအဖွဲ့၏ (၁၀) ကြိမ်မြောက် ဝန်ကြီးများအဆင့် အစည်းအဝေးသို့ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်ထောင်စုဝန်ကြီးခေါင်းဆောင်သော မြန်မာကိုယ်စားလှယ်အဖွဲ့ တက်ရောက်ခဲ့ခြင်းဖြင့် မြန်မာနိုင်ငံအနေဖြင့် အာဆီယံအပါအဝင် ဒေသတွင်းစီးပွားရေးပူးပေါင်းဆောင်ရွက်မှု များ (GMS , BIMSTES , ACMECS) အပြင် လက်ရှိနိုင်ငံတော်၏ စီးပွားရေးပြုပြင်ပြောင်းလဲမှုချက်များနှင့်အညီ ကမ္ဘာ့ကုန်သွယ်ရေးအဖွဲ့၏ နိုင်ငံစုံကုန်သွယ်မှုတွင်လည်း တက်ကြွစွာပါဝင်ဆောင်ရွက်နေခြင်းကို ထင်ဟပ်စေ ခဲ့ပါသည်။

ကမ္ဘာ့ကုန်သွယ်ရေးအဖွဲ့၏ နိုင်ငံစုံကုန်သွယ်မှုလုပ်ငန်းစဉ်များဆောင်ရွက်ခြင်းဖြင့် မြန်မာနိုင်ငံအနေဖြင့် ကုန်သွယ်မှုလျင်မြန်ချောမွေ့စေရေး၊ ကုန်သွယ်မှုနှင့် ဝန်ဆောင်မှုလုပ်ငန်းများတွင် ဈေးကွက်အခွင့်အလမ်းများ ပိုမိုရရှိစေရေး၊ မိမိပို့ကုန်များကို အရည်အသွေးနှင့် စံချိန်စံနှုန်းများ ပိုမိုမြှင့်တင်ရေးနှင့် ဈေးကွက်များ ပိုမို ကျယ် ပြန့်စွာ ရှာဖွေနိုင်ရေး အစရှိသော အခွင့်အလမ်းများ ရရှိမည် ဖြစ်ပါကြောင်း သုံးသပ်တင်ပြအပ်ပါသည်။